बगरमा परिणत भएको जमिन पुन : खेतीयोग्य

2017/03/13 2:50:46 PM

सिन्धुली, ३० फागुन । जिल्लाको विभिन्न नदी तथा खोलाले कटान गरेर बगरमा परिणत भएको करिब ५०० हेक्टर खेतीयोग्य जमिन पुनः खेतीयोग्य भएको छ ।

जलउत्पन्न प्रकोप नियन्त्रण कार्यालयको सहयोगमा विभिन्न नदी तथा खोलामा तटबन्ध गरिएपछि बगरमा परिणत भएको जग्गा अहिले खेतमा परिणत भएको हो । सो कार्यालयको मझौला नदी नियन्त्रण कार्यक्रमअन्तर्गत कमला नदीको १४ वटा स्थानमा, मरिनमा १२, तावामा दुई, चदाहा खोलामा दुई तथा सुनकोसी नदीको कुशेश्वरधाम क्षेत्रको दुईवटा स्थानमा तटबन्ध गरिएको कार्यालयले जनाएको छ ।

जलउत्पन्न प्रकोप नियन्त्रण कार्यालयको रु तीन करोड १० लाख लागतमा उक्त जमिनलाई खेतीयोग्य बनाइएको हो । बगरलाई खेतीयोग्य जमिन बनाइएपछि करिब एक हजार २०० घरपरिवार लाभान्वित हुने बताइएको छ ।

त्यस्तै कमला नदी नियन्त्रण १४ वटा कार्यक्रमअन्तर्गत एक हजार ८८ वटा जालीका लागि रु ८० लाख बजेट उपलब्ध गराइएको थियो । तटबन्ध गरेपछि यस वर्षबाट खेतीयोग्य जमिन कटानको समस्या टरेको छ । यहाँका करिब ३०० घरधुरी लाभान्वित हुने छन् ।

जिल्लाका ठूला तथा मझौला नदीले खेतीयोग्य जमिन कटान गर्ने समस्या रहेका स्थानलाई प्राथमिकतामा राखेर कार्यक्रम सञ्चालन गरिएको डिभिजन कार्यालयका इन्जिनियर सुदानन्द झाले बताउनुभयो । बढी जोखिम भएका स्थानमा कमभन्दा कम खर्चमा स्थानीय उपभोक्ताको सहभागितामा परियोजना सञ्चालन गर्ने गरेको उहाँ बताउनुहुन्छ ।

डिभिजन कार्यालयले जिल्लामा स्थलविशेष गरिने प्रकोप नियन्त्रण आठवटा कार्यक्रममा रु ४० लाख, पहिरो व्यवस्थापनका दुईवटा कार्यक्रममा रु १० लाख, बस्ती बजार संरक्षणका दुईवटा कार्यक्रममा रु १० लाख, जोखिमयुक्त जिल्ला सदरमुकाम बचावट कार्यक्रमका लागि रु एक करोड र राष्ट्रिय पुनःनिर्माण कोष नदी नियन्त्रण तथा पहिरो व्यवस्थापन कार्यक्रम ९भूकम्पबाट प्रभावित० आठवटा कार्यक्रममा रु ४२ लाख २५ हजार बजेट विनियोजन गरेको छ । रासस

प्रतिक्रिया दिनुहोस

सम्बन्धित समाचार