खानेपानी तथा सरसफाईराज्यमन्त्री दिपक खड्काले प्रधानमन्त्री पुष्पकमल दाहाल प्रचण्डले आजै राजिनामा दिने खुलासा गरेका छन्। मन्त्री खड्काका अनुसार प्रधानमन्त्रीले राजिनामा दिएलगत्तै कांग्रेस सभापति शेरबहादुर देउवा प्रधानमन्त्री बन्ने पक्का भएको छ । त्यस्तै उनले स्थानीय तहको पहिलो चरणको निर्वाचनमा पनि आफ्नो पार्टी नै पहिलो पार्टी बन्ने दाबी प्रस्तुत गरेका छन् । यीनै विषयमा केन्द्रित रहेर पत्रकार ऋषि धमलाले मन्त्री खड्कासँग गरेको कुराकानीको सम्पादित अंश :

पछिल्लो मतपरिणामलाई कांग्रेसले कसरी लिएको छ ?

अहिले सिंगो मतपरिणामको कुरा भन्दा नेपाली कांग्रेसले जो व्यवस्थालाई संस्थागत गर्न अर्थात् निर्माण भएको संविधानलाई कार्यान्वयन गर्न, मुलुक र जनताले जित्नका निमित्त अहिले रहेको व्यवस्थालाई अरुले फेरी चलाउन नसक्नेगरि व्यवस्थित् गर्नको लागि स्थानीय तहको निर्वाचन आवश्यक थियो र, पहिलो चरणको निर्वाचन सम्पन्न भएको छ । त्यसकारण यहाँनिर कांग्रेसको जित सुनिश्चित छ । नेपाली कांग्रेस के चाहन्छ भने संख्यामा पार्टी तलमाथि हुन सक्छ, तर हामी मुलुक र जनताले जितेको हेर्न चाहन्छौं । यसर्थ पनि यो निर्वाचनको महत्व रहेको छ । यसमै नेपाली कांग्रेसको जित रहेको छ ।

मतपरिणाम हेर्दा कांग्रेस पहिलो पार्टी हुन सक्ने आधारहरु देखिएनन् नि, किन ?

अहिले धेरै ठाउँको मतगणना गर्न बाँकी नै छ । नेपाली कांग्रेस पहिलो पार्टी हुनेमा कुनै शंका छैन । तथापि कदमकदापि एक दुई सिटले तलमाथि भैहाल्यो भनेपनि केही छैन । पार्टी भन्दा पनि देशले जित्नुपर्छ । स्वर्गीय गिरिजाबाबुलेपनि भन्नुभएको कुरा यहाँहरुलाई याद होला कि उहाँले भन्नुभएको थियो । देशले हार्नुहुँदैन । पार्टी हार्दा केही फरक पर्दैन । त्यसैले हामीले संघीय लोकतान्त्रिक गणतन्त्रात्मक व्यवस्थालाई बलियो बनाउनुपर्छ । अबको एजेण्डा भनेको नै संविधान कार्यान्वयन गर्ने र मुलुकलाई आर्थिक समृद्धितर्फ लैजानुपर्छ भन्ने नै हो ।

तर पहिलो चरणको निर्वाचनको मतपरिणाम आउँदै गर्दा जनताले एमालेलाई रोजेको देखियो नि ?

लोकतान्त्रिक अभ्यासमा के हुन्छ भने धेरै पार्टीहरु हुने, अनि जनतासमक्ष पुग्ने अनि जनताहरुका माँग पूरा गर्छु, यो गर्छु भन्ने भएकोले त्यसमा प्रतिष्पर्धा हुने भएकोले यसलाई नेपाली कांग्रेसले अनौठो मान्दैन् । सबै आन्दोलनहरु नेपाली कांग्रेसले नै नेतृत्व गरेको छ । कांग्रेस मुलुकमा एकचोटी कमजोर हुँदाखेरि देश कमजोर हुँदो रहेछ भन्ने जनताले बुझेका छन् । ०६४ सालको निर्वाचनको याद सबैलाई छ । हाम्रो पार्टीको कम सिट आएको कारण संविधान बन्न सकेन । पहिलो संविधानसभा विघटन भएर दोस्रो संविधानसभाको निर्वाचन ०७० मा हुँदा कांग्रेस पहिलो पार्टी भयो र संविधान जारी हुनपनि सक्यो । त्यसकारण नेपाली कांग्रेस कमजोर हुँदा मुलुक र जनता नै कमजोर हुन्छन है भन्ने कुरा नेपाली जनताहरुले राम्रोसँग बुझ्नुभएको छ । त्यसकारण पहिलो चरणको स्थानीय तहको निर्वाचनमा पनि हाम्रो पार्टी पहिलो पार्टीको हैसियतमा नै रहन्छ । हामी विजयी हुन्छौं । यसमा मलाई विश्वास छ ।

यो पटकको निर्वाचनमा कांग्रेसले माओवादी केन्द्रसँग तालमेल गर्यो, यसले कांग्रेसलाई नै घाटा पुर्यायो रे नि ?

त्यस्तो त मलाई लाग्दैन । तालमेलका कारण कांग्रेसलाई घाटा भएको कुरा मलाई चाहीँ व्यक्तिगत रुपमा महशुस भएको छैन । तालमेल त हेर्नुहोस ने अरु पार्टीहरुको पनि भएकै छ । हामी लोकतन्त्र र गणतन्त्रमा विश्वास गर्नेहरुवीच तालमेल हुनसक्छ । यस्तै खाले तालमेल र गठबन्धनले नै लोकतान्त्रिक अभ्यासलाई संस्थागत गर्छ । यसर्थ तालमेल अझै जरुरी छ । यदि यो व्यवस्थालाई संस्थागत गर्ने हो भने तालमेल अझै बढि नै गर्नुपर्छ । तपाईहरुलाई राम्रोसँग थाहा छ, कुनै पार्टीको एजेण्डा भनेको नै राजासहितको प्रजातन्त्र र हिन्दूराष्ट्र छ । संसदमा यो कुरा दर्ज भएको छ । त्यस्ता तत्वहरुले टाउको उठाउँदाखेरि त्यति धेरै ठूलो संख्यामा जनताहरुले बलिदान गरेरे प्राप्त भएका उपलब्धिहरु गुम्ने खतरा बढ्छ ।

तर कांग्रेस र माओवादीवीच सैद्धान्तिक रुपमा आकाश र जमिनको फरक छ नि ?

छैन । अहिले छैन । कुनै बेला थियो । माओवादी केन्द्र लोकतान्त्रिक प्रक्रियामा आईसकेको छ । माओवादी लोकतान्त्रिक गणतान्त्रिक व्यवस्था छिरिसकेको हुँदा अब एउटा मात्रै एजेण्डा भनेको समृद्ध नेपाल बनाउने हो । कांग्रेसको एजेण्डाभित्र सबै पार्टीहरु आईसकेका छन् ।

उसो भए तपाईहरु अब मुलुकलाई आर्थिक समृद्ध बनाउन सक्नुहुन्छ त ? नेतृत्वसँग त्यो साहस छ ?

एकदमै छ । हामी सक्छौं । एकदमै चाँडो भन्दा चाँडो हामी आर्थिक समृद्धि हाँसिल गर्न सक्छौं । स्थानीय तहको निर्वाचन लामो समयसम्म नहुँदा विकास निर्माणका कार्यहरु अवरुद्ध भएका थिए । अब स्थानीय तहको निर्वाचन पनि भैसकेको छ । अन्र्तराष्ट्रिय क्षेत्रबाट आउनुपर्ने लगानी पनि नआईरहेको अवस्था थियो, तर अब व्यवस्थाले गति लिईसकेको छ । अब सबै अवरुद्धहरु सूचारु भएका छन् ।

दोस्रो चरणको निर्वाचन जेठ ३१ गते नै हुन्छ ?

तोकिएै मितिमा निर्वाचन हुन्छ । सरकारले निर्णय गरिसकेको छ । प्रधानमन्त्री पुष्पकमल दाहालल प्रचण्ड र हाम्रो पार्टीका सभापति शेरबहादुर देउवाजी बसेर नै यो मिति तय भैसकेको हो । अब उहाँहरु यसबाट एक ईन्चपनि तलमाथि हुनुहुन्न । जेठ ३१ गते नै दोस्रो चरणको निर्वाचन हुन्छ । सबै जना ढुक्क भए हुन्छ।

अनि बजेट चाहीँ कहिले ल्याउने ? जेठ १५ मै ल्याउने कि चुनावपछि ?

१९ वर्षपछि नेपालमा स्थानीय तहको निर्वाचन भैरहेको छ । राजनीतिक गतिहिनताको अवस्थाबाट मुलुक गुज्रेको लामो समय भयो । यसो भएको कारणले निर्वाचन पहिलो प्राथमिकतामा रहन्छ । तर बजेट वर्षैपिच्छे आउँछ । यसमा त्यति धेरै चिन्ता लिनुपर्दैन ।

कांग्रेस र माओवादी केन्द्रवीच सहमति भए अनुसार अब शेरबहादुर देउवा प्रधानमन्त्री बन्नुपर्ने होईन र ? चुनाव त सम्पन्न भैसक्यो त ?

हो, अब उहाँ(शेरबहादुरजी) नै प्रधानमन्त्री बन्नुहुन्छ । संविधान संशोधन प्रस्ताव दुई तिहाईले पारित हुने अवस्था भयो भने एक दुई दिन ढिला होला । नभए उहाँले आजै राजिनामा दिनुहुन्छ ।

भनेपछि काँग्रेस र माओवादी केन्द्रवीचको गठबन्धन कायमै रहन्छ ?

हो । यो गठबन्धन लामो समयसम्म जान्छ ।

प्रधानमन्त्री प्रचण्डले सहमति तोड्नुभयो भने ?

हामीलाई विश्वास छ, उहाँले सहमति तोड्नुहुन्न ।

सम्बन्धित शीर्षकहरु

ताजा अपडेट