-कमलमणि पोख्रेल

५ कात्तिक, काठमाण्डौ । नेपाली कांग्रेसका बरिष्ठ नेता रामचन्द्र पौडेलको गृह जिल्ला तनहुँमा टिकट वितरणको विषयलाई लिएर विवाद चुलिएको छ । विवाद मिलाउन नसके पौडेलले नै चुनाव हार्ने अनुमान गर्न थालिएको छ ।
कांग्रेसहरुको बलियो क्षेत्र मानिएको तनहुँको निर्वाचन क्षेत्र नं १ मा वामपन्थी गठवन्धनले पौडेललाई सकस पार्ने त देखिन्छ नै, स्वंय कांग्रेस तनहुँभित्रको तछाडमछाडले पनि पौडेल असुरक्षित बन्दै गएको हुन् ।

साविक ३ वटा निर्वाचन क्षेत्र रहेको तनहुँ अहिले २ वटा निर्वाचन क्षेत्र भएको छ । ०४८ सालमा तनहुँ निर्वाचन क्षेत्र नं १ बाट विजयी भएका पौडेल ०५१ को निर्वाचनदेखि तनहुँ २ नम्बर क्षेत्रबाट निर्वाचन लड्दै विजयी बन्दै आएका छन् ।
तनहुँ कांग्रेसका कोषाध्यक्ष रेशम गुरुङका अनुसार तनहुँमा बाम गठबन्धनलाई कमजोर बनाउनका लागि कांग्रेस मिलेर जानु जरुरी छ ।

रेशम गुरुङ, कोषाध्यक्ष, नेपाली कांग्रेस तनहुँ

तनहुँ कांग्रेसको भित्रि रुप बुझेका गुरुङ भन्छन्, “कांग्रेसलाई बलियो बनाएर चुनाव जिताउनका लागि आफु जस्तो सुकै त्याग गर्न तयार छु, कांग्रेस जोगाउनुपर्छ ।”
एक नम्बर क्षेत्रको २ नम्बरमा गुरुङ समुहदाको बाहुल्यता भएकाले आफूले त्यस क्षेत्रबाट चुनाव जित्न सक्ने दाबी रेशम गुरुङको छ । “कसलाई कहाँ उम्मेदवार बनाउँदा चुनाव जित्न सकिन्छ भन्ने कुरा पार्टी नेतृत्वले बुझ्नुपर्छ ।” गुरुङले भने ।

विगतमा आफैंले छाडेको क्षेत्र नं १ का अधिकांश भूभाग समेटिएको क्षेत्र नं २ को भूगोलमा पौडेल २४ बर्षपछि फर्कन लागेका छन् । पौडेलले छाडेपछि कांग्रेसकै नेता गोविन्दराज जोशीले सम्हाल्दै आएका थिए । जोशीले तनहुँ १ बाट ०५१ र ०५६ मा भएको संसदीय निर्वाचनमा जिते पनि ०६४ सालमा भएको पहिलो संविधानसभाको निर्वाचनमा उनी तेस्रो भए । अकुत सम्पती आर्जन गरी भष्ट्राचार गरेको अभियोग जोशीमाथि लागेपछि उनको राजनीति कमजोर बनेको छ । तर अहिले जनताले आफूलाई चाहेको दाबी गर्दै जोशीले टिकटका लागि दबाब दिदै आएका छन् ।

जोशीलाई समानुपातिकमा भए पनि समावेश गर्नुपर्ने धारणा कोषाध्यक्ष गुरुङलेसमेत राख्दै आएका छन् ।

तनहुँमा पौडेल र जोशी मात्र नभै अन्य धेरै नेताहरुले पनि टिकटका लागि दाबी गर्दै आएका छन् । अमरराज कैनी,  रेशम गुरुङ, प्रदिप पौडेल, गोविन्द भट्टराई, धु्रव वाग्ले, शंकर भण्डारी लगायतका कांग्रेस नेताहरु तनहुँबाट उम्मेदवारका लागि योग्य मानिएको छ । उल्लेखित नेताहरुलिाई मिलाउन सके तनहुँमा कांग्रेसको जित निश्चित भएको गुरुङको तर्क छ । “यस विषयमा पौडेलले मिलाउन सक्नुपर्छ ।” गुरुङ भन्छन् ।

नेपाली कांग्रेसका पूर्व सह महामन्त्रीसमेत रहेका गोविन्दराज जोशीलाई क्षेत्र नम्बर १ बाट टिकट दिन माग गर्दै तनहुँका कांग्रेस कार्यकर्ताले केही अघि सदरमुकाम दमौलीमा प्रदर्शनसमेत गरेका थिए । त्यस्तै टिकट पाउनुपर्छ भन्दै जोशी आफै पनि पार्टी सभापति शेरबहादुर देउवा लगायतका प्रभावशाली नेताकहाँ धाइरहेका छन् ।

सम्बन्धित शीर्षकहरु

Close  ×

ताजा अपडेट