काठमाडौं, १ कार्तिक । गैरआवासीय नेपाली संघ (एनआरएनए) का नवनिर्वाचित पदाधिकारीले प्रधानमन्त्री शेरबहादुर देउवासँग आज भेटवार्ता गरेका छन् ।
अध्यक्ष भवन भट्टको नेतृत्वमा गएका पदाधिकारीले प्रधानमन्त्री निवास बालुवाटारमा भेटवार्ता गरेका हुन् । भेटवार्तामा उपाध्यक्षद्धय कुमार पन्त र कुल आचार्यको पनि सहभागिता रहेको थियो ।
सोमबार भएको निर्वाचनको मंगलबार बिहान २ बजे आएको परिणामअनुसार भट्टले १ हजार १९७ मत ल्याउँदै विजयी भएका हुन्। अष्ट्रेलिया आधारित अध्यक्ष प्रत्यासी जमुना गुरुङ ५८४ मत ल्याएर पराजित भइन्। विद्युतीय मतदान मेसिन प्रयोग गरेका कारण राति नै मतपरिणाम आएको थियो ।
भट्ट र गुरुङ आ—आफ्ना प्यानलै खडा गरेर प्रतिस्पर्धामा थिए। अध्यक्ष, तीन उपाध्यक्ष, महासचिव, एक सचिव, कोषाध्यक्षसहित सबै मुख्य पदहरुमा भट्ट समूह विजयी भएको छ।
