काठमाण्डौ, ३ कात्तिक । नायिका रेखा थापाले काठमाण्डौ क्षेत्र नम्बर ४ बाट प्रत्यक्ष चुनाव लड्ने तयारी भइरहेको बताएकी छिन् । नेपाली रेडियो नेटवर्कको कार्यक्रम नेपाली बहसमा ऋषि धमलासँग कुरा गर्दै नायिका थापाले केन्द्रिय संसदका लािग चुनाव लड्ने निश्चित भइसकेको बताएकी हुन् ।
२,३ वटा क्षेत्रबाट प्रस्ताव आइसकेकाले कहाँबाट लड्ने भन्ने निश्चित नभए पनि काठमाण्डौ क्षेत्र नम्बर ४ बाट लड्ने सम्भावना बढि रहेको थापाले बताइन् ।
“म पनि उठ्ने हो, गगनजी पनि उठ्नुहोला, अरु कोही पन उठ्लान् । तर कोही व्यक्तिसँग प्रतिस्पर्धा गर्न नभै जनताको मन जित्नका लागि चुनाव लड्ने हो ।” थापाले भनिन् ।
कलाकारको रुपमा आफू सबैको साझा भए पनि एजेण्डा र झुकाबका हिसाबले कुनै एउटा दलमा आवद्ध भएको थापाको तर्क छ । थापाले आफु राष्ट्रवादी पार्टीमा आबद्ध भएको बताइन् । थापा अहिले पशुपतिशमशेर राणा नेतृत्वको राप्रपा प्रजातान्त्रिकमा आबद्ध छिन् ।
बरिष्ठताका आधारमा कमल थापा र पशुपतिशमशेर राणाबिच तुलना हुन नसक्ने थापाको तर्क छ । उनले पशुपति शमशेर राणा सच्चा राष्ट्रवादी भएको बताइन् ।
जनताको चाहना अनुसार आफु गणतन्त्रवादी वा राजतन्त्रवादी जे पनि बन्न सक्ने थापाको भनाई छ । हिन्दुराष्ट्रको सवालमा पनि जनताले जे चाहन्छन् त्यही कुरा अगाडि सार्ने थापाको भनाई छ ।
समय र पार्टीको एजेण्डा अनुसार नेपालको राजनीतिमा पार्टी परिवर्तन आवश्यकता रहेको थापाले बताइन् । समय आएपछि आफूले जनताको हितमा काम गर्ने दाबी थापाले बताइन् ।
चलचित्र रुद्रप्रियाले दर्शकको मन जितेको दाबी गर्दै थापाले नेपालको समसामयिक अवस्थाको चित्रण गरेको बताइन् ।
लक्ष्मीपूजाको दिन रिलिज गरिएको रुद्रप्रिया कम्तिमा एक हप्ता हाउसफुलका साथ चल्ने नायिका थापाले बताइन् ।
