काठमाडौं, २ चैत । संघीय समाजवादी फोरमलाई सरकारमा सामेल गराउन ओलीले मन्त्रालय संख्या २१ पुर्याएका हुन्। गाभिएको २२ दिनपछि केन्द्रीय सरकारका तीन मन्त्रालय फुटाइएका छन्।
यसअघि ३१ मन्त्रालय रहेकोमा ओलीले प्रधानमन्त्री निर्वाचित भएलगत्तै फागुन ११ मा नेपाल सरकारको कार्यविभाजन नियमावली संशोधन गरेर मन्त्रालय संख्या १८ कायम गराएका थिए। उनले मन्त्रीको आकांक्षी व्यवस्थापनका लागि मन्त्रालय संख्या २१ पुर्याएका हुन्।
यसअघि १८ मन्त्रालय कायम गर्दा जलश्रोत तथा उर्जा मन्त्रालय बनाइएको थियो। सो मन्त्रालयलाई विजभान गरी उर्जा र सिँचाइ बनाइएको हो।
त्यस्तै श्रम, रोजगार,महिला बालबालिका तथा सामाजिक सुरक्षा मन्त्रालय पनि टुक्रने भएको छ। श्रम तथा रोजगार छुट्टै मन्त्रालयको रूपमा रहने छन्। यसअघि एकैठाउँमा आउनुअघि पनि यी दुई मन्त्रालय छुट्टाछुट्टै थिए। अब श्रम तथा रोजगार एउटा मन्त्रालय र महिला बालबालिका तथा सामाजिक सुरक्षा अर्को मन्त्रलायको रूपमा रहनेछ।
त्यस्तै शिक्षा, विज्ञान तथा प्रविधि र युवा तथा खेलकुद मन्त्रालय पनि टुक्रिन भएको छ। सरकारले शिक्षा विज्ञान तथा प्रविधि मन्त्रालयलाई छुट्टै कायम गर्ने भएको छ। त्यस्तै युवा तथा खेलकुद् मन्त्रलाय छुट्टै राख्ने भएको हो। ३१ मन्त्रालयको रूपमा रहँदा यी तीन वटै मन्त्रालय छुट्टाछुट्टै थिए। संविधानले केन्द्र सरकारमा बढीमा २५ मन्त्री हुनसक्ने व्यवस्था गरेको छ।
