रोल्पा, १ भदौ । पश्चिम रोल्पालाई जिल्ला सदरमुकाम लिवाङसँग जोड्न आजदेखि रोल्पाको माडी खोला पुल निर्माण गर्न थालिएको छ । सत्र महिनाभित्र निर्माण सक्ने गरी पुल निर्माणको जिम्मा पाएको एसियाटिक राज जेवी कन्ट्रक्सनले गत असार ३१ गते रु तीन करोड ५१ लाखमा निर्माण गर्ने संझौता गरेको छ ।
विसं ०६५ मा सडक विभागमा खोलिएको ठेक्कामा काठमाडाँैको लामा÷एडी÷धर्मेन्द्र जेभी निर्माण कम्पनीले सो पुल निर्माणको जिम्मा पाएको थियो । शुरुमा निर्माणको केही काम गरे पनि राजनीतिक पहुँचका आधारमा निर्माण व्यवसायी वसन्त दशौदीले निर्माणमा आलटाल गरेकाले जिल्लाका राजनीतिक दल र सामाजिक सङ्घ संस्थाको टोलीले सङ्घर्ष समिति बनाएर प्यूठानस्थित सडक डिभिजन कार्यालयमा उजुरी गर्दै यथाशिघ्र पक्की निर्माण गर्न जोड दिएका थिए ।
वैकल्पिक व्यवस्थाका लागि सो नदीमा बेलीब्रिज राखिए पनि आवतजावतमा निकै समस्या भएकामा अब बन्ने पुलले सो समस्या समाधान हुने यातायात व्यवसायी रामचन्द्र थापाले बताए । पुल निर्माणस्थलमा रहेको कडा चट्टानका कारण यातायातका साधन सञ्चालनमा निकै चुनौती ब्योहोर्दै आएका थियौँ, अब यस्ता समस्या समाधान हुुने उनको भनाइ थियो ।
पुल निर्माणसँगै पश्चिम रोल्पामा उत्पादन भएका तरकारी, फलफूल, घीउ, दाल, जडिबुटी र खसी–बोका सदरमुकाम लिवाङ ल्याउन किसानलाई सहज हुने भएको छ । सदरमुकाम लिवाङ, सुलीचौरजस्ता बजार क्षेत्रमा खपत हुने अधिकांश तरकारी पश्चिम रोल्पाबाट सल्यान, दाङ हँुदै आउँदा लागत मूल्य बढेकामा पुल निर्माणपछि बजार मूल्य कम हुने उपभोक्ताले आश गरेका छन् ।
सो पुल बनेसँगै रोल्पाका साविक दुई दर्जन बढी गाविस तथा दाङ र सल्यानसम्मको यातायात सेवासमेत सहज हुने बताइएको छ ।यसअघि उक्त पुलका लागि दुई वटा पिलर ठड्याएर बेवारिसे अवस्थामा छोडिएको थियो । रासस
