काठमाडौँ, ४ भदौ । स्पेनिस ला लिगा फुटबलमा रियल मड्रिडले विजयी शुरुवात गरेको छ । गेटाफेलाई २–० ले पराजित गर्दै स्पेनिस जाइन्ट रियलले विजयी शुरुवात गरेको हो । घरेलु मैदान सान्टियागो बर्नबेउमा रियललाई जिताउन ग्यारेथ बेल र डेनी कार्भाहलले गोल गरेका थिए ।
खेलको २० औं मिनेटमा कार्भाहलको हेड गोलमार्फत रियलले खेलमा अग्रता लिइको थियो । मैदानको बायाँ भागबाट बेलले क्रस गरेको बललाई गेटाफेका गोलरक्षक डेभिड सोरियाले पञ्च गरेर फालेको बललाई कार्भाहलले गरेको गोलले जाली चुमेको थियो।
५१ औं मिनेटमा ग्यारेथ बेलले गोल गर्दै रियलको अग्रता दोब्बर पार्यो । यसपटक अघिल्लो गोलको लागि अवसर सिर्जना गरेका बेलले मार्को एसेन्सियोको पासमा डि–बक्सभित्रबाट गोल गरेका थिए । ५३ औं मिनेटमा एसेन्सियोको प्रहार बारमा लाग्दा रियलले गोल अन्तर बढाउने अवसर गुुमायो ।पहिलो हाफमा १–० को अग्रता बनाएको रियलले दोस्रो हाफमा थप एक गोल गर्न सफल भयो
गेटाफेविरुद्ध खेलमा पकड जमाएपनि थप गोल गर्न नसक्दा रियलले २–० को जित निकाल्न सफल भयो ।एजेन्सि
