काठमाडौं, २ असोज । नेपाल निर्माण व्यवसायी महासंघको २० औं साधारणसभा आगामी बिहीबारदेखि काठमाडौंमा सुरु हुने भएको छ। महासंघले मंगलबार काठमाडौंमा पत्रकार सम्मेलन गरी २० औं साधारणसभा आगामी बिहीबारदेखि काठमाडौंमा सूरु हुने औंपचारिक जानकारी गराएको हो।
३ दिनसम्म चल्ने साधारण सभाले महासंघको तीन वर्षका लागि भावी नेतृत्व समेत चयन गर्नेछ । सर्वसम्मतिमै नेतृत्व चयन गर्नेगरी साधारणसभाको तयारीको कामलाई अघि बढाइएको महासंघका अध्यक्ष विष्णुभाई श्रेष्ठले जानकारी दिए। साधारणसभालाई भव्य रुपमा सम्पन्न गर्न अध्यक्ष श्रेष्ठकै नेतृत्वमा ३ सय ३१ सदस्यीय मूल आयोजक समिति गठन गरिएको छ।
बिहिबार प्रधानमन्त्री केपी ओलीले साधारण सभाको उद्घाटन गर्नु हुनेछ। शुक्रबार राजनीतिक तथा आर्थिक प्रतिवेदन पारित गर्ने र शनिबार नेतृत्व चयन गरी साधारण सभालाई सम्पन्न गर्ने कार्यतालिका पनि तय गरिएको महासंघका महासचिव रामशरण देउजाले जानकारी दिए।
तस्विर : मुकुन्द कालिकोटे
