इंग्लिस प्रिमियर लिग : म्यानचेस्टर सिटी शीर्ष स्थानमा उक्लियो

घरेलु मैदान इदिहाद स्टेडियममा सिटीलाई जित दिलाउन सर्जियो अग्यूरो, बर्नार्डो सिल्भा, फर्नानडिन्हो, रियाद महरेज र लोरी सानेले गोल गरे ।

बर्नलीविरुद्ध पहिलो हाफमा एक गोल गरेको सिटीले दोस्रो हाफमा थप चार गोल गरेको थियो । खेलको १७ औं मिनेटमा अग्यूरोको गोलबाट अग्रता लिएको सिटीले पहिलो हाफ १-० को अग्रता बनाएको थियो।

दोस्रो हाफमा आक्रमक खेलेको सिटिका लागि ५४ औं मिनेटमा सिल्भाले गोल गर्दै अग्रता दोब्बर बनाए। त्यसको २ मिनेटपछि फर्नानडिन्होले गोल गर्दै सिटीको अग्रता ३-० को बनाए। त्यसपछि पनि सिटी गोल गर्न रोकिएन । खेलको ८३ औं मिनेटमा महरेजले गोल गर्दै सिटीको अग्रता ४-० को बनाए।

त्यसपछि खेलको अन्तिम मिनेटमा सानेले गोल गर्दै सिटीलाई ५-० को सहज जित दिलाए । यो जितसँगै सिटी लिगको शीर्ष स्थानमा उक्लिएको छ। सिटीले ९ खेलबाट ७ जितसहित २३ अंक जोडेको छ। सिटीले चेल्सीलाई २ अंकले पछि पार्दै शीर्ष स्थानमा उक्लिएको हो। पराजित बर्नली ८ अंक जोडेर नवौं स्थानमा छ। एजेन्सीको सहयोगमा