दाङ, ३ माघ । प्रमुख प्रतिपक्षी दल नेपाली काङ्ग्रेसका नेता एवम् पूर्व अर्थमन्त्री डा रामशरण महतले काङ्ग्रेसभित्र ठूलो समस्या रहेको खुलासा गरेका छन् । पछिल्लो समय काङ्ग्रेस धेरै पछाडि परेको भन्दै उनले नेतृत्वमा सुधार ल्याउन आवश्यक रहेको बताए ।
बिहीबार घोराहीमा दाङका पत्रकारसँगको कुरकानीमा नेता महतले यस्तो बताएका हुन् । “काङ्ग्रेस अहिले धेरै पछि परेको छ, पार्टीको भित्री व्यवस्थापन र नेतृत्वमा समस्या छ”, उनले भने, “नेतृत्वमा सुधार गर्दै जाने, व्यवस्थापन गर्दै जाने कुरामा हामीले कोशिश गरिराखेका छौँ र काङ्ग्रेस नयाँ दिशामा अगाडि बढ्छ ।”
त्यस्तै, उनले वाइडबडी विमान प्रकरणमा पार्टीका सभापति संलग्न रहेको कुरा सञ्चारमाध्यममा आएजस्तो सत्य नभएको जिकिर गरे । नेता महतले यसबारेमा छानबिन समितिको अध्ययन र अदालतको प्रक्रियाले पुष्टि गर्नेसमेत बताए ।
