चितवन, ५ जेठ । राष्ट्रिय क्रिकेट खेलाडी सन्दीप लामिछानेले खेलाडीलाई चाहिने वातावरण देशमा नभएको गुनासो गरेका छन् । शनिबार चितवनमा गौतमबुद्ध अन्तर्राष्ट्रिय क्रिकेट रंगशाला निर्माणका लागि खेलकुद क्षेत्रबाट सहयोग संकलन समिति गठन तथा घोषणा कार्यक्रममा उनले यस्तो बताएका थिए ।
सन्दीपले नेपालमा क्रिकेट खेल्ने रंगशाला, खेल्ने वातावरण, खेलाडीलाई हुने सुविधालगायतको उचित व्यवस्था हुनुपर्नेमा जोड दिए । राम्रो क्रिकेट रंगशाला भए नेपाली खेलाडीहरु देशबाहिर गएर फ्रेन्चाइज लिग खेल्नुको सट्टा आफ्नै देशमा फ्रेन्चाइज लिग आयोजना गरेर खेल्न सकिने उनले बताए । उनले गौतमबुद्ध अन्तर्राष्ट्रिय क्रिकेट रंगशाला निर्माणका लागि सक्दो सहयोग गर्न सबैलाई आह्वानसमेत गरे ।
