सरकारले भारत सरकारसँग दुई वटा रेल सेट खरिद प्रक्रिया अघि बढाएको छ । रेल सेट खरिदसँगै आगामी दशैंसम्ममा सो रेल सञ्चालन गर्ने सरकारले तयारी गरेको छ ।
निर्माणाधीन जयनगर–कुर्था रेलमार्ग सञ्चालनका लागि सो सेट खरिद गर्न लागिएको भौतिक योजना तथा यातायात मन्त्रालयले जनाएको छ ।
दुवै देशका सरकारीस्तरबाट रेल खरिद प्रक्रिया शुरुआत गर्न लागिएको मन्त्रालयका प्रवक्ता राजेश्वर ज्ञवालीले बताउनुभयो । उहाँका अनुसार रेल खरिदका लागि नेपाल सरकारले रकम पठाइसकेको छ । उहाँले भन्नुभयो, “केही समयभित्रै रेल आइपुग्नेछ ।”
सो रेल सेट भारतको सरकारी कम्पनी कोनकान कम्पनीमार्फत खरिद गर्न लागिएको रेल विभागले जनाएको छ । डिजेल इलेक्ट्री मल्टिपल युनिट प्रविधिको सो सेटमा एउटामा पाँच वटा डिब्बा रहने विभागका प्रवक्ता अमन चित्रकारले बताउनुभयो ।
उहाँका अनुसार सरकारले अहिले दुई वटा सेट खरिद गर्दा त्यसमा जम्मा १० डिब्बा रहन्छन् । यसको क्षमता एक हजार दुई सयसम्म यात्रु बोक्ने रहेको उहाँले बताउनुभयो । उहाँले भन्नुभयो, “हामीले भनेको क्षमताभन्दा एक दुई सयसम्म तलमाथि हुनसक्छ ।”
भारतको जयनगरबाट धनुषाको जयनगरसम्म ३५ किलोमिटर लम्बाइको यो रेलमार्गका अरु भौतिक पूर्वाधार निमाण भइसकेको प्रवक्ता चित्रकारले बताउनुभयो । यो रेलमार्ग भारत सरकारको आर्थिक तथा प्राविधिक सहयोगमा निर्माण भइरहेको छ ।
रेल लाइन तथा रेल्वे स्टेशन तयार भइसकेको उहाँले बताउनुभयो । यसमा कुर्थाबाट बिजलपुरा खण्ड १७ किलोमिटरसमेत गरेर ५२ किलोमिटर आगामी फागुनसम्म सम्पन्न हुने र त्यसपछि रेल त्यहाँसम्म विस्तार हुने मन्त्रालयले जनाएको छ ।
जनकपुर–कुर्था रेलमार्ग निर्माणका लागि भारत सरकासँग सन् २०१० मा सम्झौता भएको थियो । त्यसको एक÷डेढ वर्ष पछिबाट काम शुरु भएको चित्रकारले बताउनुभयो । भारत सरकारको सहयोगमा सीमा क्षेत्रमा पाँच स्थानमा रेलमार्ग निर्माण हुन लागेको चित्रकारले जानकारी दिनुभयो ।
रेलमार्गतर्फ नै विराटनगरबाट बथनाहासम्म १८ किलोमिटर रेलमार्गमा १० किलोमिटरको काम सम्पन्न भएको मन्त्रालयले जनाएको छ । १० किलोमिटर रेलमार्ग सञ्चालनका लागि तयार भइसकेको छ ।
त्यस्तै, रक्सौल–काठमाडौँ रेलमार्गको पनि अध्ययनको काम अघि बढेको छ । एक सय ३५ किलोमिटरको पूर्व सम्भाव्यता अध्ययन सकिएको छ । ७२ किमीको काठमाडौँ–रसुवागढी रेलमार्गको पनि पूर्वसम्भाव्यता अध्ययन सकिएको छ ।
चार सय २१ किलोमिटर लम्बाइको बुटवल–गड्डाचौकी रेलमार्गको विस्तृत अध्ययन प्रतिवेदन९डीपीआर० सम्पन्न भइसकेको प्रवक्ता ज्ञवलीले जानकारी दिनुभयो । उहाँले भन्नुभयो, “थप अध्ययनको कामलाई आगामी आवमा निरन्तरता दिइनेछ ।”
रेलमार्गसँगै सडक यातायाततर्फ अघिल्लो वर्षभन्दा उल्लेखनीय काम भएको मन्त्रालयको दाबी छ । चालू आवको अन्त्यसम्ममा ९५० किमी कालोपत्र सम्पन्न हुने प्रवक्ता ज्ञवलीले बताउनुभयो ।
असार २० गतेसम्ममा देशभर ८७२ किमी कालोपत्र सम्पन्न भएको थियो । अघिल्ला वर्षमा नेपाल सरकार र स्थानीय तहले गरेको विकास निर्माण तथ्याङ्कमा जोडिने भए पनि यस वर्ष सङ्घीय सरकारको मात्रै तथ्याङ्कमा देखिएको छ ।
सरकारले ३०० सडक पुल निर्माण सम्पन्न गर्ने लक्ष्य लिएकामा २४३ सम्पन्न भएको प्रवक्ता ज्ञवालीले बताउनुभयो । चालू आवमा एक हजार ५० किमी ग्राभेल र ३१५ किमी ट्र्याक खोलिएको मन्त्रालयले जनाएको छ । रासस
