रौतहट, मंसिर २२ । महिलालाई बलात्कार गरेको आरोपमा यमुनामाई गाउँपालिका, सरुअठा हेल्थ पोस्टका इन्चार्ज ४५ वर्षीय सुधिरकुमार सिंहलाई जिल्ला प्रहरी कार्यालय रौतहटको टोलीले पक्राउ गरेको छ। गत मंसिर १८ गते चितवनबाट रौतहट घुमफिर गर्न आएकी एक ३० वर्षीया महिला घर फर्कन गौर बसपार्कमा बसको प्रतीक्षा गरिरहेकी थिइन्।
सोही मौका पारी डाक्टर सिंहले उनलाई चितवन जाने बस चढाइदिने भन्दै मोटरसाइकलमा राखेर सरुअठा हेल्थपोस्ट लगेका र त्यहीँ रातभर थुनेर बलात्कार गरेको खुलेको प्रहरीले बताएको छ। आफूलाई चरम यातना दिई बलात्कार गरेको भन्दै ती महिलाले भोलिपल्टै विभिन्न महिला अधिकारवादी संघसंस्था र मकवानपुर प्रहरीको सहयोगमा जिल्ला प्रहरी कार्यालय रौतहटमा दोषी सिंहमाथि कडा कारबाहीका लागि जाहेरी दर्ता गराएकी थिइन्। पीडित महिलाको जिल्ला अस्पताल गौरमा स्वास्थ्य परीक्षण गरिएको छ।
उनको जाहेरीको आधारमा डाक्टर सिंहलाई पक्राउ गरी आवश्यक अनुन्धान भइरहेको रौतहट प्रहरीले जनाएको आजको नागरिक दैनिकमा खवर छ ।
