पुष २३, काठमाण्डौ । अमेरिका र इरानबीचको विवादले इराकमा खटिएका नेपाली शान्ति सेनासमेत खतरामा परेका छन् ।
दुई देशबीचको विवादलाई मध्येनजर गर्दै नेपाली सेनाले इराकमा शान्ति स्थापनाका लागि खटिएका नेपाली शान्ति सैनिकलाई सतर्क रहन निर्देशन दिएको छ ।
अमेरिकाको कारबाहीमा इरानी सैन्य कमान्डर कासिम सुलेमानीको मृत्यु भएपछि अमेरिकी सेनाको बेसक्याम्पमा मिसाइल आक्रमण हुन थालेपछि नेपाली सेनाले इराकको किरकुक र इरविलमा रहेका नेपाली शान्ति सैनिकलाई सतर्कता अपनाउन निर्देशन दिएको हो ।
सेनाले बुधबार विज्ञप्ति जारी गरी अहिलेसम्म नेपाली शान्ति सैनिक सकुशल रहेको पनि उल्लेख गरेको छ ।
शान्ति स्थापनाका लागि इराकमा तैनाथ नेपाली सेनाको गार्ड युनिटलगायत लेबनान र सिरियामा तैनाथ नेपाली सेनाका युनिटमा पनि विशेष सतर्कता अपाउन निर्देशन दिएको सेनाको जनसम्पर्क तथा सूचना निर्देशनालयले जनाएको छ ।
निर्देशनालयको विज्ञप्तिमा लेखिएको छ–“अनमिन मिसन ईराकमा तैनाथ नेपाली सेनाको गार्ड युनिट लगायत अनफिल मिसन लेवनान र अनडोफ मिशन सिरियामा तैनाथ नेपाली सेनाका युनिटहरुलाई विशेष सुरक्षा सतर्कता अवलम्बन गर्न, परिस्थितिको निरन्तर अनुगमन गर्न तथा मिशन हेर्डक्वार्टर र श्री शान्ति सेना सन्चालन निर्देशनालयसँग निरन्तर सम्पर्कमा रहन निर्देशनसमेत दिइएको जानकारी गराइन्छ ।”
