२४ पौष : म्यानचेस्टर सिटीले प्रिमियर लिगमा म्यानचेस्टरविरुद्ध बेहोरेको हारको बदला मंगलबार राति लिग कपमा लिएको छ । ओल्ड ट्राफोर्डमा भएको पहिलो लेगको सेमिफाइनलमा सिटीले ३-१ ले विजयी रह्यो । डिफेन्डिङ च्याम्पियन पहिलो हाफमा आक्रमक रह्यो र यसका लागि बर्नाडो सिल्भा र रियाद महारेजले गोल गरे । आन्द्रेस परेराको नाममा एक गोल आत्मघाती रह्यो ।
युनाइटेडका कप्तान रहेको मार्कस रसफोर्डले खेल सकिन २० मिनेटअगाडि एक गोल फर्काए । अब जनवरी २९ मा दास्रो लेग हुनेछ । त्यसमा अहिलेको हार उल्टाउन युनाइटेडले कडा मिहिनत गर्नुपर्नेछ ।ओल गनर सोल्सायरको टिमले गत महिना आल्र्ड ट्राफोर्डमै सिटीलाई लिगमा हराएको थियो । लगतै सिटी वोल्भसविरुद्धको खेलमा पनि पराजित भएपछि टोलीको लिग उपाधि रक्षा गर्न अभियानमा ठूलो धक्का पुगेको थियो । अहिले पेप ग्वार्डिओलाको टिमले घरेलु दुई कप र युरोपेली च्याम्पियन लिगमा आफ्नो ध्यान केन्द्रित गरेको छ । त्यसैले ग्वार्डिओलाले युनाइटेडविरुद्ध शक्तिशाली टिम उतारेको थियो ।
खेलपछि ग्वार्डिओलाले आफ्नो टिमको सेमिफाइनलमा आधा काम मात्र सकिएको र युनाइटेडले दोस्रो लेगमा फर्कन बलियो प्रयास गर्ने सम्भावना रहेको बताएका छन् । युनाइटेडका व्यवस्थापक सोल्सायरले भने सिटीको आक्रामक रणनीतिसामु आफ्नो टिम फिक्का रहेको स्विकारे ।
