वैशाख २२, काठमाण्डौ । नेपालमा हालसम्म कोरोना संक्रमितको संख्या ७५ पुगेको छ । पछिल्लो २४ घण्टामा नयाँ संक्रमित थपिएका छैनन् । हिजो एकै दिन नेपालगन्जमा १५ जना संक्रमित थपिएका थिए ।
नेपालगंजमा अन्यको पनि परीक्षण भइरहेकाले संक्रमित थपिन सक्नेछन् । संक्रमित ७५ जनामध्ये ५८ जना पुरुष र १७ जना महिला छन् । प्रदेश नम्बर १ मा ३१ जना, प्रदेश दुईमा १३ जना, बागमति प्रदेशमा ७ जना संक्रमित रहेका छन् ।
त्यसैगरी गण्डकी प्रदेशमा २, प्रदेश पाँचमा १७ र सुदूरपश्चिम प्रदेशमा ५ जना संक्रमित रहेका छन् । कर्णाली प्रदेशमा भने अहिलेसम्म संक्रमित भेटिएका छैनन् । माथि उल्लेखित ७५ जनामध्ये १५ जना उपचारपछि निको भइसकेका छन् । निको भइसकेका १ जनाको स्वास्थ्य अवस्था फेरी शंकास्पद भएपछि पुनः अस्पताल भर्ना गरिएको छ । अहिले ५९ जनाको उपचार भइरहेको छ । सबैको स्वास्थ्य अवस्था समान्य रहेको स्वास्थ्य तथा जनसंख्या मन्त्रालयका प्रवक्ता डा. विकास देवकोटाले जानकारी दिए ।
