शरद रेग्मी : दाङ, २५ जेठ । दाङस्थित कोरोना बिशेष अस्पताल बेलझुण्डीबाट १० जना संक्रमितको डिस्चार्ज भएको छ । कोरोना बिशेष अस्पताल बेलझुण्डीका मेडिकल सुपरिटेण्डेन्ट डा. सर्वेश शर्माका अनुसार बाँकेका ५ जना, कपिलबस्तुका दुईजना, दाङका दुईजना र बर्दियाका एक जनाको डिस्चार्ज गरिएको हो । दाङका दुईमध्ये एकजना घोराही र गढवाका एकजना रहेका छन् ।
तीमध्ये केहीको कोरोना रिपोर्ट पनि नेगेटिभ आएपछि डिस्चार्ज गरिएको हो, भने केही भने लक्षण नै नभएपछि डिस्चार्ज गरिएको हो । उनका अनुसार उनीहरुलाई राखेको २२र२३ दिनसम्म पनि कुनै लक्षण नदेखिएपछि सरकारले गरेको परिपत्रका आधारमा डिस्चार्ज गरिएको हो । बाँकेका २, दाङका एक, कपिलबस्तुका एक र बर्दियाका एक जनाको तेस्रो रिपोर्ट भने नेगेटिभ आएर डिस्चार्ज गरिएको हो भने अन्य ५ जनाको लक्ष्ण नभएपछि डिस्चार्ज गरिएको हो ।
स्वास्थ्य मन्त्रालयले कोभिड–१९ केशको आइसोलेसन व्यबस्थापन सम्बन्धि निर्देशिकामा कुनै पनि लक्षण नदेखिएपछि संक्रमितलाई १४ दिनपछि डिस्चार्जगर्ने भनि उल्लेख छ । सोही अनुसार मन्त्रालयले गरेको परिपत्रका आधारमा उनीहरुलाई डिस्चार्ज गरिएको हो । उनीहरु डिस्चार्ज भएसंगै बेलझुण्डीमा ४५ जना संक्रमितको उपचार भइरहेको छ ।
