काठमाडौँ, ६ असार : प्रमुख प्रतिपक्षी दल नेपाली काँग्रेसका वरिष्ठ नेता रामचन्द्र पौडेलले श्रमको सम्मान आजको आवश्यकता रहेको बताउनुभएको छ । सामाजिक लोकतन्त्र अध्ययन केन्द्रले आज यहाँ आयोजना गरेको ‘लोकतान्त्रिक समाजवाद र सूदुरपश्चिम प्रदेश’ विषयक भर्चुअल अन्तरक्रियामा उहाँले नेपालमा श्रमको सम्मान नहुँदा लाखौँ युवा विदेशिन बाध्य हुनु परेको बताउनुभयो ।
वरिष्ठ नेता पौडेलले भन्नुभयो, “श्रमको सम्मान गर्ने संस्कृतिको विकास गर्न नसकेसम्म विदेशिने र सहरमा जनसङ्ख्याको चाप बढ्ने अवस्थाको अन्त्य हुँदैन ।” उहाँले गाउँको विकास, गाउँका जनतालाई रोजगारी र गाउँमा नै जनतालाई आम्दानीको बाटो पहिल्याउनु अहिलेको मुख्य आवश्यकता रहेको उल्लेख गर्नुभयो । उहाँले महाकाली सन्धिको कार्यान्वयन नहुँदा सुदूरपश्चिम प्रदेश विकासको गतिमा अगाडि बढ्न नसकेको बताउनुभयो ।
वरिष्ठ नेता पौडेलले बन्दाबन्दी खुकुलो हुन थालेपछि पार्टीको १४औँ महाधिवेशनको कार्यतालिका तत्काल परिमार्जन गरेर महाधिवेशनको काम अगाडि बढाउनुपर्ने उल्लेख गर्नुभयो । काँग्रेसभित्र व्यापक सुधारको खाँचो रहेको उहाँको भनाइ थियो ।
काँग्रेसद्वारा दलित नेताको निधनमा दुःख व्यक्त
नेपाली काँग्रेसले नेपाल दलित सङ्घ खोटाङका अध्यक्ष हिराबहादुर विकको निधनप्रति दुःख व्यक्त गरेको छ । काँग्रेस केन्द्रीय कार्यालयका मुख्यसचिव कृष्णप्रसाद पौडेलले आज एक शोक विज्ञप्तिमार्फत स्व विकप्रति श्रद्धाञ्जलि अर्पण गर्दै शोकसन्तप्त परिवारजनमा समवेदना प्रकट गर्नुभएको छ ।
पार्टी खोटाङका पूर्वजिल्ला सदस्यसमेत रहनुभएका ५६ वर्षीय विकको शुक्रबार हलेसी तुवाचुङ नगरपालिका–४ स्थित आफ्नै निवासमा निधन भएको थियो । नेपालको लोकतान्त्रिक आन्दोलनमा सक्रिय भूमिका निर्वाह गर्नुभएका विकको निधनले काँग्रेसले एक कुशल व्यक्तित्व गुमाउनुका साथै काँग्रेसलाई अपूरणीय क्षति पुगेको बताएको छ ।रासस/File Photo
