ललितपुर, २० भाद्र । दुई दिनयता जिल्ला प्रहरी कार्यालय ललितपुरमा ठुलो संख्यामा युवाहरु पक्राउ गरी राखिएका छन् । युवाहरुको संख्या अझै थपिने क्रम चलेको छ । ती युवाहरु पुल्चोकमा मच्छिन्द्रनाथको रथ तान्ने क्रममा प्रहरीसँगको झडपमा संलग्न भएको अभियोगमा पक्राउ गरिएका हुन् ।
ललितपुरको विभिन्न भागहरुबाट युवाहरु पक्राउ गरिएका छन् । विशेषगरी पाटन र आसपासका क्षेत्रका युवाहरु बढी पक्राउ परेका छन् ।
प्रहरीले घटनामा संलग्नहरुबारे भिडियो हेरेर खोजी गरेको थियो । उनीहरुको हुलियाका आधारमा ठेगाना पत्ता लगाउँदै पक्राउ गरिएको हो ।
विश्वस्त स्रोतका अनुसार प्रहरीले उनीहरु घुसपैठी हुनु या कसैबाट सञ्चालित हुन् कि भन्नेबारे पनि सुचना संकलन गरिरहेको छ । पक्राउ पर्नेहरुमा पाटन क्षेत्र, इमाडोललगायतका युवाहरु बढी रहेकाले त्यस क्षेत्रमा प्रहरीले सादा पोशाकमा समेत खोजी बढाएको बुझिएको छ ।
पुल्चोकमा गत बिहिबार मच्छिन्द्रनाथको रथ तान्न पुगेकालाई प्रहरीले रोक्न खोज्दा झडप भएको थियो । त्यस क्रममा प्रहरी र स्थानीय दुवैतर्फ केही घाइते भएका थिए ।
