वीरगंज, २३ भदौ । मधेस आन्दोलनका शहीदको तस्वीर वीरगंज महानगरको फोहरको थुप्रोमा मिल्काइएको भिडियो भाइरल भएपछि अहिले पर्साका नेताहरुको आलोचना शुरु भएको छ भने सर्वसाधारण आक्रोशित भएका छन् । मंगलवार जनता समाजवादी पार्टी पर्साका नेताहरुले फोहरमा मिल्काइएको तस्वीर ल्याएर घण्टाघरमा सम्मान कार्यक्रम गरेका थिए ।
कार्यक्रममा मधेसी शहीदहरुको तस्वीर फोहरमा मिल्काउनेलाई कारबाइ गर्न जसपाका नेताहरुले माग गरेका थिए । कार्यक्रममा जसपाका जिल्ला अध्यक्ष रामनरेश यादव, जिल्ला समन्वय समितिका प्रमुख नेक महम्मद अन्सारीलगायतले मन्तव्य राखेका थिए । यसैगरी नेपाल विद्यार्थी संघ पर्साले पनि वीरगंज महानगरपालिका घेराउ गर्दै मधेसी शहीदको अपमान गर्नेलाई कारबाइको माग गरेका थिए ।
