काठमाडौं, ८ मंसिर । झरना थापाले निर्माण गरेको फिल्म ‘ए मेरो हजुर ३’ बाट नेपाली चलचित्र प्रवेश गरेकी हुन्, नायिका सुहाना थापा । उनी हाल ‘ए मेरो हजुर ४’ फिल्मको सुर्टिङमा व्यस्त छिन् । उनलाई पहिलो फिल्ममा नै सबै दर्शकले मन पराएका थिए । उक्त फिल्म बक्स अफिसमा सुपरहिट भएको थियो ।
केही दिन अगाडी मात्र घोषणा गरिएको फिल्म ‘डिसेम्बर फल्स’ मा पनि सुहानालाई प्रस्ताव गरिएको जनाइएको छ । यो फिल्ममा नायक र नायिकाको उमेरको अन्तरलाई प्रेमिल तरिकाले देखाउन खोजिएको निर्माण पक्षले जनाएको छ । यस फिल्ममा चकलेटी अभिनेता आर्यन सिग्देल यस अघि नै अनुबन्धित भइसकेका छन् । फिल्म घोषणा भएको दिनमा निर्माता लक्ष्मण रिजालले अभिनेत्रीको टुंगो भइनसकेको र कुरा भइरहेको जानकारी दिएका थिए ।
सुहानालाई ‘डिसेम्बर फल्स’बाट अफर आएको र उनले स्क्रिप्ट पढिरहेको भएपनि काम गर्ने वा नगर्ने हालसम्म टुंगो नलागेको पारिवारिक श्रोतले जनाएको छ । सुहानाले ‘ए मेरो हजुर ४’ फिल्मको काम सकेपछि ‘डिसेम्बर फल्स’ मा काम गर्ने पनि सम्भावना रहेको एक श्रोतले जनाएको छ । अनमोल केसीसँग २ फिल्ममा रोमान्स गरेकी सुहानाले यो फिल्म काम गर्न तयार भएमा आर्यन सिग्देलसँग उनको जोडी जम्नेछ ।-तस्वीरः सुहाना थापाको फेसबुकबाट
