काठमाडौं, ९ बैशाख । सनराइज बैंकले दुई स्थानमा शाखारहित बैंकिङ्ग सेवा विस्तार गरेको छ । ललितपुर जिल्लाको महाङ्काल गाउँपालिका वडा नं.–६ को ठुलादुर्लुङ र सप्तरी जिल्लाको खड्क न.पा वडा नं.–११ को बनौलीमा बैंकले शाखारहित बैंकिङ्ग सेवाको सुरुवात गरेको हो ।
सो दुई शाखारहित बैंकिङ्ग सेवा संचालनमा आएसँगै बैंकको शाखारहित बैंकिङ्ग सेवा संख्या ७६ पुगेको जनाएको छ । बैंकको अनुसार बैंकिङ्ग सेवाको माध्यमबाट बचत तथा भुक्तानीका लागि शाखा कार्यालय नभएको ठाँउबाट समेत शाखारहित बैंकिङ्ग सेवा अन्तर्गत ग्राहकहरले एटिएम कार्ड प्रयोग गरी निक्षेप सकंलन, रकम भुक्तानी, रकम स्थानान्तरण, बिल भुक्तानी समेत गर्न सक्नेछन् ।
कृषि र रेमिट्यान्स प्रमुख आयस्रोत रहेको सो क्षेत्रका बासिन्दाहरुमा बैंकिङ्ग पहुँच बढाउने उद्देश्यका साथ बैंकिङ्ग सेवा सुरु गरेको बैंकले जानकारी दिएको छ ।
हालसम्म बैंकले १३९ वटा शाखा, ७६ वटा शाखारहित बैंकिङ्ग सेवा, १२ वटा एक्सटेन्सन काउण्टर र १६१ वटा ए.टि.एम मार्फत आफ्ना ७ लाख भन्दा बढी ग्राहकहरुलाई सेवा प्रदान गर्दै आइरहेको बताएको छ ।
