काठमाडौं, १० वैशाख । नेकपा एमालेका अध्यक्ष केपी शर्मा ओलीले नेताहरु माधवकुमार नेपाल र झलनाथ खनाल पक्षधर सांसद तथा नेताहरुलाई आफ्नो पक्षमा तान्ने प्रयास जारी राखेका छन् । आश र त्रास दुवै देखाएर ओली पक्षले तान्ने प्रयास जारी राखेकामध्ये सूचीमा योगेश भट्टराई पनि छन् ।
ओलीले योगेशलाई आफ्नो पक्षमा आउन आग्रह गरेका छन् । जवाफमा योगेशले आफूमात्र आएर नहुने जवाफ दिएका छन् । उनले पार्टी एकतामा जोड दिएको बुझिएको छ ।
उनले नेताहरु माधव नेपाल, झलनाथ खनाल र बामदेव गौतमसँग बैठक बसेर सहमति निकाल्न जोड दिए । सबैलाई मिलाएर गएमा पार्टी मजबुत हुने सुझाव दिएका थिए । व्यक्तिमा भन्दा पार्टीको समग्र हितमा जोड दिएका थिए ।
पछिल्लो समय योगेश भट्टराई एमाले एकताका लागि सक्रिय भएका छन् । उनको पहलमा ओली र नेपालबीच भेटवार्ता भएको थियो ।
