काठमाडौं, १० वैशाख । नेकपा एमालेलाई फुटबाट जोगाउने हिजोको प्रयास सफल हुन सकेन । अध्यक्ष केपी शर्मा ओली पक्षधरबाट कडा बोली आइसकेको छ । ओलीका सल्लाहकार डा.राजन भट्टराईले २७ सांसदहरुमाथि कारबाही हुनसक्ने बताइसकेका छन् । उता माधव नेपालले बालुवाटारको बालुवा पेलेर तेल ननिस्कने देखिसकेको टिप्पणी गरे । बामदेव गौतम डिनर बैठकबाट जुरुक्क उठेर हिंडे । यसबाट एमालेभित्र कुनै दुर्घटनाको संकेत देखिइसकेको छ ।
प्रधानमन्त्री केपी शर्मा ओली सत्ता टिकाउन एकपछि अर्को राजनीतिक अस्त्र प्रयोग गर्दै आएकामा फेरि अर्को कठोर कदम चाल्दै छन् । उनले पार्टीका विरोधीलाई ठेगान लगाउने देखि अनेकन कडा राजनीतिक चालहरु चालिरहेका छन् । ओलीले पूर्वप्रधानमन्त्री माधवकुमार नेपाल निकट सांसदहरुको सूची बनाएर कारबाही गर्ने तयारी गरेका छन् । कारबाहीको सूची बनाइएका प्रतिनिधि सभाका २७ जना सांसद छन् । उनीहरु ओलीविरुद्ध अविश्वासको प्रस्ताव आएको खण्डमा फ्लोर क्रस गर्न सक्नेहरु मानिएको छ । २७ जनालाई नै कारबाहीका लागि स्पष्टिकरण सोधिएको छ । जसको जवाफ कतिपयले दिएका छन् । तैपनि, ओली कठोर रुपमा बढ्न लागेको देखिदैछ ।
सांसद पदबाट नै मुक्त गर्ने सूचीमा प्रत्यक्ष निर्वाचित माधवकुमार नेपाल, झलनाथ खनाल, भीम रावल, सुरेन्द्र पाण्डे, योगेश भट्टराई, घनश्याम भुसाल, यज्ञराज सुनुवार, सोमप्रसाद पाण्डे, विरोध खतिवडा, दिपकप्रकाश भट्ट, कृष्णलाल महर्जनका अलावा समानुपातिकतर्फ गरी कुल २७ जना सांसद रहेका छन् । उनीहरु माधव नेपालको निर्देशन मान्ने खालका नेताहरु रहेको भन्दै कारबाही गर्न लागिएको हो ।
प्रतिनिधि सभामा आफूविरुद्ध अविश्वासको प्रस्ताव आउनसक्ने संकेत पाएपछि ओलीले पार्टीभित्रै कारबाहीको डण्डा चलाउन लागेका हुन् । फ्लोर क्रस गर्न सक्नेहरुलाई पदमुक्त गरेर ओलीले सत्ता सुरक्षित गर्दै चुनावमा जाने रणनीति बनाएको बुझिएको छ । यसैगरी, कर्णाली प्रदेशमा फ्लोर क्रस गर्ने ४ सांसद र अर्का एक गरी ५ जनामाथि पनि कारबाही हुने भएको छ । सबैजनालाई प्रदेशसभा सांसदबाट पदमुक्त गरिने भएको छ । कर्णालीको फ्लोर क्रसले ओली स्वयं अप्ठ्यारोमा परेका छन् । यसको असर अन्य प्रदेशहरुमा पनि पुगिसकेको छ ।
कारबाहीको सूचीमा राखिएका सांसदहरु
माधवकुमार नेपाल
झलनाथ खनाल
भीम रावल
सुरेन्द्र पाण्डे
घनश्याम भुसाल
योगेश भट्टराई
यज्ञराज सुनुवार
सोमप्रसाद पाण्डे
विरोध खतिवडा
यज्ञराज सुनुवार
दिपकप्रकाश भट्ट
कृष्णलाल महर्जन
मुकुन्द न्यौपाने
रामकुमारी झाँक्री
पवित्रा निरौला
झपट रावल
मेटमणि चौधरी
जीवनराम श्रेष्ठ
भवानी खापुङ
नारायण खतिवडा
जयकुमार राई
गणेश पहाडी
हिराचन्द्र केसी
पुष्पाकुमारी कर्ण कायस्थ
कल्याणी खड्का
लक्ष्मीकुमारी चौधरी
सरलाकुमारी यादव
नीरादेवी जैरु
कर्णाली प्रदेशका सांसद
प्रकाश ज्वाला
नन्दसिंह बुढा
कुर्मराज शाही
अम्बरबहादुर थापा
देवी ओली
