काठमाडौं, १६ वैशाख । राष्ट्रिय जनमोर्चाका वेपत्ता भनिएका सांसद खिमविक्रम शाहीको एकै दिन दुईवटा कोरोना टेष्ट भएको खुलेको छ । उनको एउटा रिपोर्टमा नेगेटिभ आएको खुलेको छ । अर्को, रिपोर्ट भने पोजेटिभ आएको दाबी गरिएको छ ।
गण्डकी प्रदेश सभामा मुख्यमन्त्री पृथ्वी सुब्बा गुरुङ्गविरुद्ध अविश्वासको प्रस्तावमाथि मतदान हुने तय हुँदा शाही वेपत्ता भएका थिए । उनको खोजीको माग गर्दै जनमोर्चाकी सांसद पियारी थापाले निवेदन दर्ता गरेपछि प्रदेश सभा बैठक अनिश्चितकालीन स्थगित गरिएको छ ।
सांसद शाही कोभिड वार्डमा रहेको र स्वास प्रस्वासमा समस्या आएको चरक अस्पतालले जानकारी दिएको छ । उनी स्वास प्रस्वासको समस्या भई भर्ना भएको अस्पतालको दाबी छ । मङ्गलबार राति १२ बजे भर्ना भएको अस्पतालको भनाई छ ।
तर, सांसद शाहीको हिजो विहान कोभिड १९ को परीक्षणको रिपोर्ट नेगेटिभ आएको थियो । उनको परीक्षणको रिपोर्ट विहान आउँदा कोरोना नेगेटिभ छ ।
अविश्वासको प्रस्तावमाथि मतदान हुनुभन्दा केही घन्टा अघिसम्म सम्पर्कमा नआएपछि उनको खोजी भएको थियो ।
रिपोर्टर्स नेपालले चरक अस्पतालसँग सम्पर्क गर्दा ज्ञानबहादुर शाहीको नाममा १३ वैशाखको राति १२ बजेबाट आइसियूको बेडमा ५८ वर्षीय व्यक्ति रहेको जानकारी दिइएको थियो । अस्पतालका अनुसार १३ गते राति १२ बजेबाट शाही भर्ना भएका हुन् ।
ज्ञानबहादुर शाही नाममा अस्पतालमा ५८ वर्ष र पोखरा ५ जिरो किलोमिटर ठेगाना राखिएको छ ।
यसैगरी, चरक अस्पतालमा सुरक्षाकर्मी बढी परिचालन गरिएको छ । अस्पतालमा सांसद शाहीलाई भेट्न जान दिइएको छैन ।
