सुनसरी, २० जेठ । अवैध औषधि ट्रामाडोल सहित ३ जनालाई प्रहरीले पक्राउ गरेको छ । हरिनगर गाँउपालिका–५ बसन्तपुरबाट ३ हजार ४ सय ८० क्यापसुल अवैध औषधि ट्रामाडोल सहित ३ जना बुधबार पक्राउ परेका हुन् ।
पक्राउ पर्नेहरुमा इटहरी उपमहानगरपालिका बस्ने परिक्षण कुँवर, सोही ठाउँ बस्ने विजय अधिकारी र हरिनगर गाँउपालिका–६ बस्ने नसिम अन्सारी रहेका छन् । सुनसरीको घुस्कीबाट चैनपुर संखुवासभाको लागि कामदार लिएर जाँदै गरेको प्र.१–०२–००२ च ४७२७ नम्बरको गाडीलाई बसन्तपुर बेस क्याम्पबाट खटिएको प्रहरीले जाँच गर्ने क्रममा उक्त औषधि सहित फेला पारी गाडी चालक बिजय समेत उनीहरुलाई पक्राउ गरेको जनाएको छ ।
उनीहरुलाई आवश्यक कारबाहीका लागि औषधि व्यवस्थापनको कार्यालय बिराटनगर पठाइएको जिल्ला प्रहरी कार्यालय सुनसरीले बताएको छ ।
