काठमाडौं, असार १४। निषेधाज्ञा अवधिभर नेपालमा सुनको आयात ठप्प भए पनि निषेधाज्ञा खुकुलो भएपछि बाणिज्य बैंकहरूले २०० केजी सुन आयात गरेका छन् ।
गत असार ८ गतेदेखि निषेधाज्ञा केही खुकुलो बनाएर सुनचाँदी पसल पनि खुला गर्न दिएको छ । त्यसपछि नेपाल सुनचाँदी व्यवसायी महासंघको सिफारिशमा नेपाल बैंकर्स संघले त्यस बराबरको सुन आयात गरेको हो ।
महासंघका पूर्वअध्यक्ष मणिरत्न शाक्यले महासंघको सिफारिशमा बैंकर्स संघबाट २०० केजी सुन आयात भएको जानकारी दिए । ‘बैंकर्स संघले त्यो सुन आयात गरेर व्यवसायीहरूलाई वितरण गरिसकेको छ,’ उनले भने, ‘यसपालि काठमाडौं उपत्यकाका लागि १०० केजी र उपत्यकाबाहिरका लागि १०० केजी सुन आयात गरिएको छ ।’
कोरोनाको दोस्रो लहर शुरू भएपछि जिल्ला प्रशासन कार्यालयमार्फत अधिकांश जिल्लाहरूमा निषेधाज्ञा लगाइएको थियो । गत वैशाख १२ गतेदेखि नै सुन आयात ठप्प थियो । अहिले निषेधाज्ञा खुकुलो भएपछि सुन आयात गर्न शुरू गरिएको आजको आर्थिक अभियान दैनिकमा खवर छ ।
