आज बिहान नेपाली रेडियो नेटवर्क (एनआरएन) को कार्यक्रम नेपाली बहसका लागि पत्रकार ऋषि धमलासँग कुरा गर्दै नेता तुलाधरले भने, “हामीले एमसीसीलाई आवश्यकताभन्दा बढी उचाल्यौं । अहिले निल्नु न ओकल्नु भएको छ । त्यसले पार्टीलाई फुटाउने तहमा लैजान्छ । गठबन्धनलाई भत्काउने तहमा लैजान्छ । त्यसैले हामीले गठबन्धन दलहरुको भावना समेटेर अघि जानुपर्छ । एमसीसीका कारण पार्टी र गठबन्धन फटाउनु हुँदैन ।”
माधव नेपालले फातिमा सुमार नेतृत्वको एमसीसी टोलीलाई पारित गर्ने वचन दिनुभएको हो भन्ने पत्रकार धमलाको प्रश्नमा उनले भने, “अहिले हामी नयाँ दल छौं । हाम्रो दलमा यसबारे छलफल भएको छैन । हामीले नेपाल र नेपाली जनताको हितभन्दा पर गएर या गठबन्धनभन्दा बाहिर गएर निष्कर्ष दिन पनि सक्दैनौं । यसमा हामीले साझा धारणा बनाउन सक्नुपर्छ । त्यसैले माधवकुमार नेपालले कुनै वचन दिनुभएको छैन । अर्को कुरा के हो भने हाम्रो पार्टीको धारणाले मात्र एमसीसी पारित हुनेवाला छैन । शेरबहादुर देउवाजीको इच्छाले मात्र पनि हुँदैन ।”
एकीकृत समाजवादी पार्टीका कारण मन्त्रिपरिषद् विस्तार हुन नसकेको भन्नु गलत हुने उनले बताए । उनले थपे, हो, “मन्त्रिपरिषद् विस्तारका लागि भदौ २२ सम्म हामीले पर्खाएका हौ । तर २३,२४ र २५ गते पनि नभएकाले यो गठबन्धनका अरु दलको पनि समस्या हो भन्ने बुझ्नुपर्छ । अब पनि मन्त्रिपरिषद् विस्तार नहुने हो भने यसले जनतामा निराशा छाउँछ ।”
