बैतडीं, मङ्सिर ६ । बैतडीमा जन्ती बोकेको जीप दुर्घटना हुँदा मृत्यु हुनेको सङ्ख्या ६ पुगेको छ । जन्ती बोकेर दशरथचन्द नगरपालिका–६ सिमायलतर्फ जाँदै गरेको जीप आईतबार बेलुकी कलुवाड मोडमा दुर्घटनामा परेको थियो ।
जीपमा सवार रहेका सात जनामध्ये पाँचजनाको घटनास्थलमा नै मृत्यु भएको बैतडीका प्रहरी प्रवक्ता प्रहरी निरीक्षक दर्शन खड्काले बताए । दुर्घटनामा परी घाइते भएका २ जना मध्ये १ जनाको उपचारको क्रममा मृत्यु भएको हो ।
गम्भिर घाइते भएका एक जनाको उपचार भइरहेको छ । मृत्यु हुने सबै दशरथचन्द नगरपालिका–६ का रहेका छन् । दशरथचन्द नगरपालिका–६ का ४८ वर्षीय राजेन्द्रबहादुर चन्द, ३८ वर्षीय धनबहादुर चन्द, ६५ वर्षीय प्रेमबहादुर चन्द, ६५ वर्षीय तारासिंह थापा र ५८ वर्षीय खेमसिंह कार्की र जीप चालक डडेल्धुराका ४० वर्षीय दीपक मालीको मृत्यु भएको हो । जीप सडकबाट सात सय मिटर तल खसेको छ ।
