काठमाडौं, ७ पौष । ललिता निवास जग्गा प्रकरणमा मुछिएका रामकुमार सुवेदी र उनकी पत्नी माधवी सुवेदीलाई मध्य पुषको ठण्डी पारेर प्रहरीको केन्द्रीय अनुसन्धान ब्युरो सीआइबीले पक्राउ गरेको छ । उनीहरुलाई मङ्गलबार साँझ सोल्टीमोडस्थित निवासबाट सीआइबीको टोलीले पक्राउ गरेको हो । ललिता निवास प्रकरण लामो समययता चर्चामा आएपनि सुवेदी अहिले नै आएर किन पक्राउ परे ? चासोको विषय बनेको छ ।
सुवेदी निर्धक्कसँग हिडिरहेका थिए । तर, उनलाई प्रहरीले पक्राऊ गर्न पाइला सारेको थिएन । अचानक अहिले आएर पक्राउ पर्नुमा केही राजनीतिक विषय पनि जोडिएको देखिदैछ ।
ललिता निवास प्रकरणमा पूर्व प्रधानमन्त्रीहरु माधवकुमार नेपाल र डा. बाबुराम भट्टराई पनि मुछिएका छन् । उनीहरुविरुद्ध अख्तियार दुरुपयोग अनुसन्धान आयोगले छानविन गरी मुद्दा चलाउननुपर्ने भन्दै सर्वोच्च अदालतमा मुद्दा विचाराधीन पनि छ । यो प्रकरणमा मुछिएका विजयकुमार गच्छेदारविरुद्ध अख्तियारले मुद्दा दायर गरेको थियो । नाम चलेकाहरु यो प्रकरणमा मुछिएका छन् ।
शोभाकान्त ढकाल र रामप्रसाद सुवेदीले योजनावद्ध तरिकाले बालुवाटारको जग्गा आफ्नो नाममा ल्याएको अनुसन्धानहरुबाट खुलाइएको छ । बालुवाटारको १४ रोपनी जग्गा ढकाल र सुवेदीको नाममा छ । विभिन्न व्यक्तिलाई जग्गा बेचेको देखाएर दिइएको समेत खुलेको छ । बालुवाटारको जग्गामा मन्त्रिपरिषदको निर्णय गराएर समेत जग्गा हडपिएको भन्दै अनुसन्धानहरु भएका छन् । तर, अख्तियारले त्यतिबेला प्रधानमन्त्री रहेका माधवकुमार नेपाल र डा. बाबुराम भट्टराईविरुद्ध मुद्दा दर्ता नभएपछि अदालतमा रिट दायर भएको छ ।
