काठमाडौं, २५ माघ । आईसीसी पुरुष टी–ट्वान्टी विश्वकप अन्तर्गतको ग्लोबल छनोट ‘ए’ मा भाग लिन नेपाली राष्ट्रिय क्रिकेट टोली आज (मंगलबार) ओमान प्रस्थान गर्न लागेको छ ।
विश्वकपमा छनोट हुने लक्ष्य बोकेको नेपाली टोली मंगलबार राति ८ः३० बजे ओमान प्रस्थान गर्ने नेपाल क्रिकेट संघ (क्यान) ले जनाएको छ ।
ग्लोबल छनोट ‘ए’ मा नेपालसहित ओमान, युएई, फिलिपिन्स, आयरल्यान्ड, क्यानाडा, बहराईन र जर्मनी रहेका छन् । खेलहरु फेब्रुअरी १८ देखि २४ तारिखसम्म हुने तालिका रहेको छ ।
समूह ‘ए’ मा नेपाल सहित क्यानाडा, फिलिपिन्स र ओमान रहेका छन् भने समूह ‘बी’ मा आयरल्यान्ड, युएई, जर्मनी र बहराईन रहेका छन् ।
नेपालले आफ्नो पहिलो खेल ओमानविरुद्ध फेब्रअरी १८ मा खेल्नेछ । यस्तै, दोस्रो खेलमा नेपालले फिलिपिन्ससँग प्रतिष्पर्धा गर्नेछ ।
तेस्रो खेलमा नेपाल क्यानाडाविरुद्ध फेब्रुअरी २१ मा भिड्ने छ ।
समूह चरणको खेलपछि शीर्ष दुई टोली दुबै समूहबाट सेमिफाइनलमा प्रवेश गर्नेछन् ।
फाइनल प्रवेश गर्ने दुबै टोली आईसीसी पुरुष टी–ट्वान्टी विश्वकपको लागि छनोट हुनेछन् ।
छनोट अघि नेपालले ओमानमा चारदेशीय टी–ट्वान्टी सिरिज खेल्नेछ ।
