काठमाडौं, फागुन १०। आईसीसी टि–२० विश्वकपको ग्लोबल छनोट ‘ए’ अन्तर्गत आज हुने पहिलो सेमिफाइनल खेलमा नेपाल र युएई भिड्दैछन् । ओमानको अल अमेराट क्रिकेट मैदानमा हुने खेल दिउँसो ३ः४५ बजे शुरु हुनेछ ।
आज हुने खेल जित्दै दुवै टोली विश्वकपमा छनोट हुने लक्ष्यसाथ मैदान उत्रिनेछन् । आजको सेमिफाइनल खेलमा जीत निकाल्ने टोलीले आगामि अक्टोबर १६ देखि नोभेम्बर १३ सम्म अष्ट्रेलियामा हुने टि–२० विश्वकपमा छनोट हुनेछ भने जारि ग्लोबल छनोटको फाइनलमा प्रवेश गर्नेछ ।
दोस्रोपटक विश्वकप खेल्ने लक्ष्यसहित ओमान पुगेको नेपाली टोलीले छनोटको समूहचरणको सबै ३ खेलमा जीत निकालेको थियो । यसअघि नेपालले सन् २०१४ मा बंगलादेशमा भएको टि–२० विश्वकपमा सहभागिता जनाएको थियो ।
पहिलो खेलमा घरेलु टोली ओमानलाई ३९ रनले पराजित गर्दै छनोटको शूरुवात गरेको नेपालले दोस्रो खेलमा फिलिपिन्सलाई १ सय ३६ रनले हराएको थियो ।
सोमबार भएको समूहचरणको अन्तिम खेलमा क्यानडालाई ८ विकेटले हराउँदै समूह ‘बी’को शिर्ष स्थानमा रहँदै सेमिफाइनल प्रवेश गरेको नेपाल आजको खेलमा पनि विजयी यात्रालाई निरन्तरता दिन चाहन्छ ।
छनोटको तयारिको रुपमा भएको चारदेशीय टि–२० आई सिरिजमा नेपालले युएईसँग २५ रनको हार बेहोरेको थियो । आजको खेलमा नेपाललाई बदला लिने राम्रो अवसरपनि रहेको छ ।
