काठमाडौं, ११ फागुन । धरानको जंगलमा जेब्रा झोलाभित्र भेटिएका दिनेश सिग्देलको हत्यामा सम्लग्न भएको अभियोगमा उनकै कान्छी श्रीमती अनिता केसी पक्राउ परेकी छिन् ।
वैदेसिक रोजगारीबाट पुस २० गते फर्किएका ४३ वर्षीय सिग्देलको हत्या गर्न अनिताको योजनामा विराटनगरका सरोज भण्डारीले सहयोग गरेका थिए ।
अनिताले पुस २२ गते साँझ ५ बजे आफ्नै कोठामा घाँटी थिचेर हत्या गरेको र हत्या गरेपछि शवलाई ग्लेन्डर मेसिन र खुकुरीको प्रयोगले टुक्राटुक्रा पारेर टेम्पोमा हालेर धरानको जंगल लगेको प्रहरीले प्रारम्भिक अनुसन्धानबाट पत्ता लगाएको छ । शव लगेर फालेको २ महिना पछि मात्र उनको शवसहितको झोला भेटिएको थियो ।
धरान भेडेटार सडकखण्डमा पर्ने जंगलमा सिग्देलको शव फेला परेपछि स्थानीयले प्रहरीलाई खबर गरेका थिए । सिग्देलको जेठी श्रीमती पनि छिन् ।
