एजेन्सी । युरोपियन च्याम्पियन रियल म्याड्रिडका मिडफिल्डर इस्कोले क्लब छाड्ने भएका छन् । इस्कोले सोमबार सामाजिक सञ्जालमा फेरवेल म्यासेज लेख्दै ९ वर्षपछि म्याड्रिड छोड्ने बताएका हुन् ।
यसअघि गत हप्ता मुख्य प्रशिक्षक कार्लो एन्सेलोट्टीले इस्कोले सिजनको अन्त्यमा क्लब छोड्ने बताएका थिए । ३० वर्षीय इस्कोले क्लबबाट झण्डै २ सय ५० खेल खेलेका छन् । इन्स्टाग्राममा लेख्दै इस्कोले क्लबका प्रशिक्षक, सहयात्री र समर्थकलाई साथ र सहयोगको लागि धन्यवाद दिएका छन् ।
सन् २०१३ मा मालागाबाट रियल म्याड्रिडमा अनुबन्ध भएका इस्कोले क्लबबाट पाँच च्याम्पियन्स लिग, तीन ला लिगा र एक कोपा डेल रेको उपाधि जितेका थिए । गत शनिबारमात्र रियल म्याड्रिडले इङ्लिस क्लब लिभरपुललाई १-० गोलले पराजित गर्दै सर्वाधिक १४ पटक च्याम्पियन्स लिगको उपाधि जितेको थियो ।
विभिन्न स्रोतका अनुसार इस्को सेभिल्लासँग जोडिने सम्भावना रहेको बताएका छन् ।
