काठमाडौं, २५ भदौ । कञ्चनपुर–२ कृष्णपुरका २७ वर्षीय एलिस विष्टले ‘गिनिज बुक अफ वर्ल्ड रेकर्ड’मा नाम लेखाउने तयारी गरिरहेका छन् । आज(शनिबार) रिपोर्टर्स क्लब नेपालमा पत्रकार सम्मेलन गरेर विष्टले ३ महिनाभित्र वर्ल्ड रेकर्ड राख्ने तयारी गरिरहेको बताए ।
उनले ३० सेकेण्डमा ८८ भन्दा बढी गाँजर काटेर वर्ल्ड रेकर्ड राखेका जापानका सेपर्डको रेकर्ड तोड्ने प्रयास गरिरहेको स्पष्ट पारे । विष्टले ३० सेकेण्डमा आफूले अहिलेसम्म ८७ वटा गाँजर काट्न सकेको पनि बताए ।
“मलाई डेढ वर्षअघि देखिनै वर्ल्ड रेकर्ड राख्ने बारे दिमागमा आएको थियो । यसपालि भने मैदानमै उत्रिन खोजेको हुँ । यसको लागि व्यापक तयारी गरिरहेको छु ।” उनले भने,“सबैले गरिराखेको देखेकै छु, के भो त आफूले पनि गरिहाल्यौ न भनेर,नसके भनेपनि प्रयास त हुन्छ नी ।” त्यसबारेमा केही सिनियर व्यक्तित्वहरुसँग पनि परामर्श लिएर अघि बढेको उनले जनाए । ‘गिनिज बुक अफ वर्ल्ड रेकर्ड’ राख्न विष्टलाई हेल्प फर हेप्पीनेस, दारी ग्याङ, फ्रिडमफोरम फुड रेष्टुरेन्टलगायत सहयोगी पार्टनर रहेका छन् ।
नारायण प्रसाद कोइरालाको प्रमुख आतिथ्यमा सम्पन्न भएको कार्यक्रममा लक्ष्मण प्रसाद मण्डल लगायतले बिष्टलाई शुभकामना दिएका थिए ।
क्लबमा आयोजना गरिएको कार्यक्रममा बिष्टले गाँजरसहित फलफुल काटेर समेत देखाएका थिए ।
