काठमाडौं, २३ मंसिर । नेकपा (माओवादी केन्द्र) का सचिव गणेश साहले समानुपातिक सांसद छान्न आफ्नो पार्टीलाई सकस परेको बताएका छन् ।
‘सांसद छान्न सबै पार्टीलाई सकस छ, हाम्रो पार्टीलाई अझ बढी सकस छ । १४ जनामा १२ जना महिलाका निम्ति त्यति गाह्रो छैन । दुई पुरुषमध्ये को सांसद बन्ने अहिले भन्न गाह्रो छ । समानुपातिक सूचीमा धेरै नेता छन् । पदाधिकारीमा हितराज पाण्डे नै हुनुहुन्छ । मन्त्री बनाउनभन्दा समानुपातिक सांसद छान्न गाह्रो भयो । पदाधिकारी बैठकमा सरसल्लाह गरेर निर्वाचन आयोगमा नाम पठाउँछौं,’ नेपाली रेडियो नेटवर्क (एनआरएन) को कार्यक्रम ‘नेपाली बहस’का लागि पत्रकार ऋषि धमलासँग कुरा गर्दै साहले भने ।
समानुपातिक निर्वाचन प्रणालीमा पुनर्विचार गर्नुपर्ने पनि उनले औंल्याए । साहले थपे, ‘समानुपातिकमा पार्टीमा योगदान गरेका सक्षम र योग्य व्यक्तिलाई ल्याउनुपर्ने हो, यहाँ त नातागोता, गर्लफ्रेन्ड, श्रीमान्–श्रीमती, भान्जाभान्जीका निम्ति दुरुपयोग भयो । आर्थिक लाभका लागि चलखेल भयो । समानुपातिकलाई अब राष्ट्रिय सभामा लानुपर्छ । यसलाई आम बहसको विषय बनाउनुपर्छ । यो निर्वाचन प्रणालीमा पुनर्विचार गर्नुपर्ने आवश्यकता छ ।’
अबको सरकार गठबन्धनकै बन्ने पनि उनले ठोकुवा गरे । साहले भने, ‘अहिलेको गठबन्धनको १३६ सिट छ । तीन जना त राजनीतिक पार्टीकै स्वतन्त्र सांसद छन् । जनमत पार्टी र जसपासमेत जुटाउँदा १५०, १६० सिटको कम्फरटेबल मेजोरिटी पुग्छ ।’
शीर्ष नेताहरुले प्रधानमन्त्रीमा सहमति जुटाउनेमा विश्वस्त रहेको उनले बताए । उनले भने, ‘अब हुने आलोपालो प्रधानमन्त्री नै हो । पहिलो को बन्ने भन्ने नमिलेको हो । निर्णयमा पुग्ने गृहकार्य भइरहेको होला । जे हुन्छ, त्यसलाई स्वीकार्छ माओवादीले । केपी ओलीको जस्तो धोकाधडी नहोला ।’
