काठमाडौं, १० फागुन । राप्रपाका वरिष्ठ उपाध्यक्ष रवीन्द्र मिश्रले ‘राष्ट्रप्रमुख’का रूपमा पूर्वराजा ज्ञानेन्द्र शाहलाई अघि सार्ने प्रस्ताव गरेका छन् । आज सामाजिक सञ्जालमार्फत मिश्रले यस्तो प्रस्ताव गरेका हुन् । उनले राष्ट्रपतिलाई राजनीतिभन्दा माथिको पद भनिएपनि राष्ट्रपतिको भूमिका सदा पार्टीगत रहेको आरोप लगाएका छन् ।
उनले सेनाबाहेक देशका सबै संस्था क्षयीकृत रहेको पनि दाबी गरेका छन् । समाज महाभ्रष्ट रहेको र धर्मसंस्कृतिमाथि धावा बोलिएको उल्लेख गर्दै देश अन्तर्राष्ट्रिय भूराजनीतिको चपेटामा परिसकेको उल्लेख गर्दै उनले राजासँग सहकार्यको प्रस्ताव गरेका हुन् ।
उनले लेखेका छन्-
यस्तो स्थितिमा राजालाई ‘राष्ट्रप्रमुख’का रूपमा विचार गर्ने कि?
राष्ट्रपतिलाई राजनीतिभन्दा माथिको पद भनियो। तर राष्ट्रपतिको भूमिका सदा पार्टीगत रह्यो। सेनाबाहेक देशका सबै संस्था क्षयीकृत छन्। समाज महाभ्रष्ट छ। IQ सन्सारमै सबैभन्दा कम छ। धर्मसंस्कृतिमाथि धावा बोलिएको छ। देश अन्तर्राष्ट्रिय भूराजनीतिको चपेटामा पर्दैछ/परिसक्यो।
यस्तो अवस्थामा कहिले ‘होली वाइन’, कहिले ‘विदेशीका एजण्ट’, कहिले ‘नातावादमा लिप्त’, कहिले ‘भ्रष्ट’ र ‘राष्ट्रघातमा अभ्यस्त’हरूको नाम राष्ट्रपतिको पदका लागि चर्चामा छ। राष्ट्रपतिको संस्था भनेको संकटको घडीमा आड दिने ‘कुशन’ हुनु पर्ने हो। तर त्यो कुशासनको केन्द्रविन्दू बनेको छ।
देश नै निरन्तर कमजोर, वदनाम र संकटउन्मुख बन्दै गएको अवस्थामा राजा ज्ञानेन्द्रलाई ‘राष्ट्रप्रमुख’का रूपमा किन अघि नसार्ने?
अरूले दशकौँसम्म दिनदिनै राष्ट्रघात गर्दा क्षम्य हुने। अहिले पनि चौतर्फीरूपमा व्यापक स्वीकार्यता भएको र देशको दिर्घकालीन शान्ति, स्थिरता, सम्मान र सार्वभौमिकताका लागि राजा ज्ञानेन्द्रले एक पटक गरेको ‘गल्ती’ सुधार्ने मौका पाउन नहुने?
राजा ज्ञानेन्द्रले भने झैँ, “अब यो देश जोगाउन प्रजातन्त्रको लागि अपरिहार्य राजनीतिक दलहरू र लामो समय देशभक्तिपूर्ण एतिहासिक विरासत बोकेको राजसंस्था आएर आपसी विश्वासका साथ सहकार्यको लागि विलम्ब गर्नु हुँदैन।”
