काठमाडौं, फागुन २३ । आगामी चैत ५ गते हुने स्वतन्त्र विद्यार्थी युनियन (स्ववियु) निर्वाचनमा तीन कम्युनिस्ट पार्टीका विद्यार्थी संगठनबीच सहकार्य गर्ने सम्भावना देखिएको छ ।
नेपाल कम्युनिस्ट पार्टी (एमाले), नेकपा (माओवादी केन्द्र) र नेकपा (एकिकृत समाजवादी) निकटका विद्यार्थी सङगठनबीच सहकार्य गर्ने विषयमा आइतबार बैठक बसेको थियो । बैठकमा मध्यपश्चिम विश्वविद्यालयका ११ वटा क्याम्पसमा संयुक्त प्यानल खडा गरी मनोनयन गरिसकेको अवस्थामा त्रिविमा पनि तीनवटै संगठनबीच सहमति गर्ने सम्भावना रहेको छ ।
एकिकृत समाजवादी निकट अनेरास्ववियुका अध्यक्ष सुदेस पराजुलीले मध्यपश्चिम विश्वविद्यालयमा तीन संगठनबीच सहमति भइसकेको जानकारी दिँदै भने, ‘सोही आधारमा अब चैत ५ गते हुन लागेको त्रिवि र ८ गते हुन लागेको सुदूरपश्चिम विश्वविद्यालयमा तीन संगठनबीच सहकार्य गर्नेछौं ।’
यसअघि सरकारआवद्ध आठ विद्यार्थी संगठनबीच सहकार्य गर्ने सहमति भएको थियो । सहमतिअनुसार संयुक्त प्यानल बनाउने निर्णय भएको थियो । तर, राजधानीलगायत देशैभरका अधिकांश क्याम्पसमा नेपाली कांग्रेस निकट नेविसंघले आफ्नै उम्मेदवार खडा गर्ने बताएपछि सरकारआबद्ध आठ संगठनबीचको सहमति भाडिएको थियो ।
यसअघि आठ विद्यार्थी संगठनले एमाले निकट अनेरास्ववियुको विरुद्धमा सबै एक भएर जाने निर्णय गरेका थिए । पछि उपत्यकाको क्याम्पसमा पद बाँडफाँट गर्ने विषयमा सहमति हुन नसकेपछि कम्युनिस्ट पार्टी निकट विद्यार्थीहरू एक भएका हुन् । सबै क्याम्पसको निर्वाचनमा पार्टीको समन्वयनमा मात्र विद्यार्थीले मनोनयन दर्ता गर्ने तयारी छ ।
आगामी चैत ५ गते देशभरिका त्रिविका ६० आङ्गिक र केही सम्बन्धन प्राप्त क्याम्पसमा स्ववियु निर्वाचन हुँदैछ । कार्यतालिकाअनुसार फागुन २७ गते बिहान ११ बजेदेखि दिउँसो २ बजेसम्म समानुपातिक तथा प्रत्यक्षतर्फको उम्मेदवारी दर्ता गर्ने कार्यक्रम रहेको छ । चैत ५ गते बिहान ८ बजेदेखि दिउँसो ४ बजेसम्मका लागि मतदान समय तोकिएको तोकिएको छ ।
त्रिविमा मिश्रित निर्वाचन प्रणालीअनुसार निर्वाचन हुनेछ । निर्वाचनमा ५० प्रतिशत सदस्य समानुपातिक प्रणालीबाट आउने छन् । त्रिविले २०७३ सालदेखि मिश्रित प्रणालीबाट निर्वाचन गर्न थालेको हो । स्ववियु निर्वाचनमा प्रत्यक्ष र समानुपातिक दुवैतर्फ २०५१ फागुन २८ गते वा सोभन्दा पछिको जन्ममिति भएको विद्यार्थीले मात्र उम्मेदवारी दिन पाउनेछन् । नेपाल समाचारपत्र दैनिकबाट
