काठमाडौं, २२ जेठ । विल्डिङ ड्रिम्स एण्ड फरेस्ट (विवाईडी) ले चखन्डोल सामुदायिक वनलाई पुनर्जीवित गर्ने प्रयास स्वरुप वृक्षरोपण गरेको छ । विश्व वातावरण दिवसको अवसरमा आज (सोमबार) विहान विभिन्न व्यक्तिहरुको उपस्थितिमा वृक्षारोपण गरिएको हो ।
‘प्लास्टिकजन्य प्रदूषण निर्मूल पारौँ, वातावरणमैत्री विकल्पको उपयोग गरौँ’ भन्ने मूल नाराका साथ आज ५०औँ विश्व वातावरण दिवस मनाइँदैछ । विवाईडीले एक हजार पाँच सय रूख रोपेर चखन्डोल सामुदायिक वनलाई पुनर्जीवित गर्ने अभियान थालेको छ ।
संयुक्त राष्ट्रसङ्घीय वातावरण कार्यक्रमको आह्वानमा सन् १९७३ देखि प्रारम्भ भई हरेक वर्ष जुन ५ तारिखको दिन विश्व वातावरण दिवस मनाइन्छ ।
