काठमाडौं, २ असार । वन तथा वातावरणमन्त्री डा. वीरेन्द्र प्रसाद महतोले चुरे नेपालीहरुको भविष्यसँग जोडिएकोले यसको संरक्षण गर्नु सबैको दायित्व भएको बताएका छन् । नवौं चुरे संरक्षण दिवसको अवसरमा आज (शनिबार) नवलपुरमा आयोजित विशेष समारोहलाई विशेष अतिथिको रुपमा सम्बोधन गर्दै मन्त्री महतोले यस्तो बताएका हुन् ।
उनले सो अवसरमा नवलपरासीको पवित्र माटोमा वृक्षारोपण गर्न पाएकोमा खुशी व्यक्त गरेका छन् । उनले भने,”चुरे नेपालीहरुसँग जोडिएको विषय भएकोले यसको संरक्षण गर्नु सरकार र सबै जनताको दायित्व हो । यो चुरे नेपालीहरुको लाइफलाईन हो । हामीले चुरेको संरक्षण गर्न सकेनौं भने दश वर्षछि हाम्रो सन्ततिलाई असर गर्छ । अहिलेको जुन समस्या हामीसँग छ, खासगरी तीनै तहको सरकारमा कानूनको स्पष्टता छैन् । हामीकहाँ भएका वन मन्त्रालयका नियम तथा कानून पनि पूराना छन् । चुरे संरक्षण गर्न खोजेको हो भने यहाँ स्थानीय र प्रदेशसँग समन्वय गर्नुपर्छ । केन्द्रबाट जति प्रयास गरेपनि संरक्षणमा ठोस प्रगति गर्न सकिँदैन् । चुरेको नाममा विभिन्न किसिमका दोहन भैरहेको छ । त्यसलाई रोक्नुपर्छ ।”
उनले वन्यजन्तु पनि अहिले गाउवस्तीमा छिर्न थालेको सुनाउँदै यसको प्रमुख कारण पनि चुरेमाथिको दोहन नै भएको बताए । उनले थपे,”अहिले कृषकहरु मारमा छन् । वन्यजन्तुका कारण बाली, नाली नोक्सानी भएको छ । वातावरण प्रदुषण बढेको छ । आज जंगल नभएको कारण र जंगलमा आहार नभएको कारण वन्यजन्तुहरु अहिले मानव बस्तीमा पसेका छन् । त्यसैले हामीले जंगललाई हरियो बनाउनैपर्छ । वन अतिक्रमण हुनबाट बचाउनुपर्छ । चुरे संरक्षण र नदि नियन्त्रण गनुपर्छ । चुरेको भूसंरक्षण गर्नुपर्छ । वृक्षारोपण गरेपछि त्यसलाई हुकार्उउनको लागि अझै धेरै मेहनत गर्नुपर्छ । सबैले आ आफ्नो ठाउँबाट चुरे संरक्षणको लागि योगदान गर्नुपर्छ ।”
