काठमाडौं, १० साउन । नेकपा (एमाले) का प्रमुख सचेतक पदम गिरीले पुष्पकमल दाहाल ‘प्रचण्ड’ प्रधानमन्त्री भएकै दिन नौ किलो अवैध सुन त्रिभुवन अन्तराष्ट्रिय विमानस्थमा भित्रिएको खुलासा गरेका छन् ।
आज (बुधबार) प्रतिनिधि सभाको बैठकलाई सम्बोधन गर्दै उनले दुवईबाट इलेक्ट्रिक सिग्रेटभित्र राखेर ल्याइएको उक्त सुन माघ २९ गतेसम्म भन्सार कार्यालयमा राखिएको उनले बताए । पुष १० देखि माघ २९ गतेसम्म उक्त सुन बाहिर ल्याउन माओवादी नेता कृष्णबहादुर महरा र उनका छोराले पटक–पटक कोशिस गरेको उनको आरोप छ ।
‘२०७९ पौष १० गतेका दिन दुवईबाट नौ किलो सुन इलेक्ट्रिक सिग्रेटका भित्र राखेर ल्याउने काम भयो । १० पौषमा ल्याएको सुन माघको २९ गतेसम्म भन्सारभित्र राखियो । त्यो बीचमा सुनलाई बाहिर लानका लागि धेरै किसिमका खेलहरु भए । हामीले सञ्चार माध्यमबाटै सुन्यौं सत्ता पक्षकै नेता नेकपा (माओवादी केन्द्) का नेता कृष्ण बहराका बाबुछोराले त्यो सुन त्यहाँबाट बाहिर लानका लागि धेरै पटक त्यहाँका अधिकृतहरुलाई फोन गर्नुभयो । त्यो सुन बाहिर पठाउन सम्भव नभएपछि इलेक्ट्रिक सिग्रेटकै रुपमा लिलाममा लानुपर्यो भनेर दवाब आयो । तर, त्यहीका कर्मचारीभित्रबाट ईलेक्ट्रिक सिग्रेटभित्रको सुन निकालेर विक्री गर्ने काम भयो,’– उनले भने ।
सत्ता पक्षकै नेता कृष्ण बहादुर महरा र उनका छोराले एक सय ९५ पटक सुन छुटाउन फोन गरेको उनको दाबी छ । भन्सार अधिकृत भक्तिराज श्रेष्ठले महराका छोराले लिलामका लागि पटक–पटक फोन गरेको स्वीकार गरेको उनले बताए ।
