काठमाण्डौं, भदौ ११ । नेपाली महिला क्रिकेट टोलीले आज थाईल्यान्डसँग अन्तिम अभ्यास खेल खेल्दैछ । नेपाली समय अनुसार अहिले बिहान पौने ९ बजे मलेसियामा खेल्ने खेल आईसीसी महिला टी–२० विश्वकप एसिया क्षेत्र छनोट अघि नेपालले अन्तिम तयारी अनुसार खेल्न लागेको हो ।
यसअघि शनिवार नेपालले चार देशीय महिला टी–२० को उपाधि जितेको थियो । फाइनलमा हङकङलाई डकवर्थ लेविस पद्धतिको आधारमा १३ रनले हराउँदै नेपालले उपाधि जितेको हो ।
आईसीसी महिला विश्वकप टि–२० एसिया क्षेत्र छनोट अगष्ट ३१ देखि ९ सेप्टेम्बरमा मलेसियामा हुनेछ। नेपालको समूहमा युएई, कतार, मलेसिया, भुटान र बहराइन छन् ।
समूह बी मा चीन, हङकङ, कुवेत, म्यानमार र थाईल्यान्ड छन् । शीर्ष दुई टोलीले सेमिफाइनल खेल्नेछन् । फाइनल पुग्ने दुई टोलीले सन् २०२४ मा ग्लोबल महिला टी–२० विश्वकप खेल्न पाउनेछन् ।
