काठमाडौं, भदौ ११ । इंग्लिस प्रिमियर लिग अन्तर्रगत गएराती भएको खेलमा लिभरपुलले न्यूकासल युनाइटेडमाथि २–१ को सनसनीपूर्ण जित निकालेको छ ।
दस खेलाडीमा सीमित लिभर पुलले १–० ले पछाडि रहेको स्थितिबाट जित हात पारेको हो । यसलाई लिभरपुलको एक उत्कृष्ट जित मानिएको छ । ट्रेन्ट एलेक्जान्डर आर्नोल्डको भुलमा एन्थोनी गोर्डनले गोल गर्दै न्युकासललाई सुरुआती अग्रता दिलाए । लगत्तै भर्जिन भान डाइक रातो कार्डमा मैदान छाड्न बाध्य रहे ।
न्यूकासलले एक खेलाडी बढिरहेको स्थितिको फाइदा लिन सकेन भने सब्स्टिच्युटका रूपमा मैदानमा छिरेका डारविन नुनेजले खेलको अन्त्यतिर दुई गोल गरे । त्यसमध्ये निर्णायक गोल दोस्रो हाफको इन्ज्युरी समयको तेस्रो मिनेटमा सम्भव भएको थियो ।
