कर्णाली, १८ असोज । कर्णाली प्रदेश सरकारका भूमि व्यवस्था, कृषि तथा सहकारीमन्त्री भीमप्रकाश शर्माले माथिल्लो कर्णाली पोषणयुक्त बाली उत्पादनको परिचित एवम् प्रचुर सम्भावनाको क्षेत्र भएको बताएका छन् ।
नेपालकै दुर्गम हुम्लामा आज सञ्चालन हुने प्रथम अन्तर्राष्ट्रिय कोदो महोत्सव उद्घाटनका लागि त्यहाँ पुगेका मन्त्री शर्माले प्रेस सेन्टर हुम्लाद्वारा आयोजित पत्रकार भेटघाटका क्रममा पोषणयुक्त रैथानेबाली उत्पादन हुने क्षेत्रका बालबालिका कुपोषण हुनु दुर्भाग्यको विषय भएको बताए ।
“जहाँ पोषणयुक्त बालीको भण्डारण छ, त्यहाँ कुपोषण हुन्छ कसरी ?”, प्रश्न गर्दै उनले भने, “तर, यहाँकै बालबालिकामा कुपोषण बढी छ भनेर खबर आइरहन्छन् र तथ्याङ्कमा पनि त्यस्तो देखिन्छ ।” अर्कोतिर कोदो, फापर, चिनो, कागुनो जस्ता रैथाने बालीको उत्पादन बढाएर कुपोषण हटाउनुपर्ने मन्त्रालयको प्रतिवेदनमा रहेको उनले बताए ।
कर्णालीमा पहिलो पटक अन्तर्राष्ट्रिय कोदो महोत्सव हुम्लामा हुनुले नयाँ सन्देश दिनुका साथै रैथाने बाली उत्पादनमा वृद्धि तथा बजारीकरणमा सहयोग पुग्ने मन्त्री शर्माको भनाइ थियो । उनले दक्षिण एशियामा सबैभन्दा कोदो उत्पादन हुने देश भारत र त्यसपछिको नेपाल भएको समेत दाबी गरे ।
कर्णालीमा उपज हुने मूल्यवान वस्तु कोदो, चिनो, कागुनो, फापरलगायत बालीको उत्पादन तथा बजारीकरणमा समायोजन हुने जनाउँदै मन्त्री शर्माले भने, “रैथाने र पोषणयुक्त मूल्यवान वस्तु उपभोग गर्ने क्षेत्रलाई गरिब, पछि परेको भन्ने भाष्य अब सम्पन्नतामा परिणत गर्नुछ, कर्णाली गरिब होइन, मूल्यवान र औषधिजन्य बाली उत्पादन गर्ने देशको महत्वपूर्ण भूभाग हो, यसको विकासमा प्राथमिकता दिन अपरिहार्य छ भन्ने सन्देश सङ्घीय सरकारलाई महोत्सवले दिनेछ ।”
कृषि मन्त्रालयका सचिव डा. नरहरिप्रसाद घिमिरेले रैथानेबाली उत्पादनसँगै यहाँका नागरिकहरुले उपभोग विधिमा विशेष ध्यान दिन सुझाए । “कर्णालीको पोषणयुक्त उत्पादनको माग अन्तर्राष्ट्रिय बजारले गर्दैछ, तर यहीँ कुपोषण बढी छ”, उनले भने, “अब हामीले खानपान र हाम्रा उत्पादनको सही सदुपयोग गर्ने कुरामा ध्यान दिन आवश्यक छ ।”
भूमि व्यवस्था, कृषि तथा सहकारी मन्त्रालय आर्थिक सहयोगमा कृषि विकास कार्यालय हुम्लाद्वारा आयोजित महोत्वसमा कोदोबाट बनेका विभिन्न खाद्य परिकार र कोदोजन्य रैथाने अन्नबाली राखिने आयोजकले जनाएको छ । रासस/File photo
