काठमाडौं, २४ असोज । कोशी प्रदेशमा सरकार गठनको लागि प्रदेश प्रमुख परशुराम खापुङले दिएको समय २६ गते साँझ ५ बजे सकिँदै छ । यद्यपि कोशी प्रदेश सरकार कुन दलले नेतृत्व गर्ने भन्ने टुंगो लागिसकेको छैन ।
प्रदेश सभाका विश्वासको मत लिन समय माग गरेपनि मुख्यमन्त्री हिक्मत कार्कीले विश्वासको मतको अभ्यासमा नगई राजीनामा घोषणा गरेपछि अहिले काम चलाउ सरकारको हैसियतमा प्रदेश सरकार रहेको छ ।
एमाले कोशी प्रदेश संसदीय दलका प्रमुख सचेतक रेवतीरमण भण्डारीका अनुसार सरकारको स्थायित्वको लागि एमाले हदैसम्म लचिलो हुन तयार छ । मुख्यमन्त्रीबाट राजीनामा दिनुअघि प्रदेश सभाको सम्बोधनमा हिक्मत कार्कीले समेत आफूलाई मुख्यमन्त्री पदका आशक्ति भएर दुई–दुई पटक सर्वोच्च अदालत नगएको बताए । एमाले प्रदेशको स्थायित्वका लागि सहमति, सहकार्य गर्न तयार रहेको उनको अभिव्यक्तिको आशय थियो ।
कोशीमा आम निर्वाचन सम्पन्न भएको नौ महिने अवधिमा पाँचै पटक मुख्यमन्त्रीका लागि आह्वान गरिएको हो । अब बन्ने सरकार अल्पमतमा परे वा प्रदेश सभाबाट विश्वासको मत पाउन नसके कोशीमा प्रदेश सभा विघटन गरी छ महिनाभित्र निर्वाचन गर्न पर्ने हुन्छ ।
प्रदेश सरकारमाथि जनताको वितृष्णा बढिरहेको अवस्थामा निर्वाचनमा जानु दुर्भाग्य हुनसक्ने प्रमुख राजनीतिक दलका नेताहरुको बुझाई छ । त्यही बुझाईका कारण अन्य छ वटा प्रदेशमा रहेको सत्ता समीकरण विपरीत कोशी सरकार बन्ने निश्चित छ ।
कोशीमा मुख्यमन्त्रीको दाबीमा कांग्रेसबाटै उद्धव थापा, केदार कार्की, संसदीय दलका उपनेता हिमाल कार्की, प्रमुख सचेतक भूपेन्द्र राई र सांसद अमृत अर्यालको दाबी छ । कांग्रेसभित्र पात्र परिवर्तन गरेर भएपनि पार्टीको नेतृत्वमा प्रदेश सरकार गठन हुनपर्ने बहुमत सांसदहरुको धारणा छ । त्यस कारण कांग्रेसबाट मुख्यमन्त्रीको बलियो दाबेदारका केदार कार्की रहेका छन् ।
‘मुख्यमन्त्रीमा मेरो दाबीको विषयमा केन्द्रमा समेत छलफल भइरहेको छ । अधिकांश सांसदहरुले पात्र परिवर्तन गरेर भएपनि कांग्रेसकै नेतृत्वमा सरकार हुनुपर्छ भन्ने अडान लिइरहनु भएको छ । एमाले पनि सरकार गठनको लागि सकारात्मक छ,’– उनले भने ।
९३ सदस्यीय कोशी प्रदेश सभामा एमालेसँग ४०, कांग्रेससँग २९, माओवादीसँग १३, राप्रपासँग ६, समाजवादीसँग ४ र जनता समाजवादी १ सिट छ । सरकारको स्थायित्वका लागि एमालेसँग मिल्नुको विकल्प नदेखिएपछि कांग्रेस एमालेसँग सहकार्यका लागि तयार रहेको बुझिएको छ ।
