काठमाडौँ, २५ असोज । प्रतिनिधिसभाको आजको बैठकमा इजरायलमा रहेका नेपालीको उद्धार र चाडबाडको समयमा आपूर्ति व्यवस्थापन सहज बनाउन सरकारको ध्यानाकर्षण गराएका छन् ।
इजरायलमा गत शनिबार भएको आतंवादी आक्रमणमा परी मृत्यु भएका नेपाली विद्यार्थीको शव स्वदेश फर्काउन तथा उद्धारमा ढिलाइ गरिएको विषय संसदमा उठेको हो । दसैँ, तिहारलगायत चाडबाडको बेला दैनिक उपभोग्य वस्तुको सहज आपूर्ति तथा यातायात सेवाको प्रत्याभूति गर्नुपर्ने उनीहरुले बताएका छन् ।
आजको बैठकको विशेष समयमा बोल्दै सांसद अर्जुन नरसिंह केसीले पछिल्लो समय धार्मिक सहिष्णुता र जातीय एकतामा विचलन आउन थालेको बताए । यस्तो विचलनले सरकार नै सङ्कटमा जाने उनको भनाइ थियो । सांसद केसीले इजरायलमा नेपालीको अवस्थाबारे जानकारी लिन र आक्रमणमा परेर मृत्यु भएकाको शव फिर्ता ल्याउने प्रक्रिया थाल्न माग गरे। साथै घाइतेहरुको उपचारको व्यवस्था गर्न सरकार गम्भीर हुनुपर्नेमा उनले जोड दिए ।
सांसद सूर्य थापाले सुदूरपश्चिम क्षेत्रको नेपाली भूमिमा भारतीय प्रधानमन्त्रीले भ्रमण गरेको विषयमा सरकारले संसद्मा जवाफ दिनुपर्ने बताए । इजरायलबाट नेपाली नागरिकको उद्धारमा ढिलाइ भएको उनको भनाइ थियो । आन्दोलनरत स्थानीय तहका कर्मचारीको जायज माग सम्बोधन गर्न उनले संसदमार्फत् सरकारको ध्यानाकर्षण गरे।
सांसद वर्षमान पुनले इजरायलमा रहेका नेपालीको उद्धार अहिले सरकारको पहिलो जिम्मेवारी भएको बताए । इजरायलमा रहेका र स्वदेश फर्किन चाहने नागरिकलाई तत्काल स्वदेश फिर्ताको प्रक्रिया थालेकामा उनले सरकारलाई धन्यवाद ज्ञापन गरे ।
दैनिक उपभोग्य वस्तु सहज रुपमा उपलब्ध हुने गरी आपूर्ति व्यवस्था सहज बनाउनुपर्नेमा सांसद पुनले जोड दिए । नेपालले वैदेशिक व्यापार गर्ने केही मुलुकसँग दोहोरो करमुक्ति सम्झौता गरिनुपर्ने उनको भनाइ थियो ।
सांसद मनिष झाले संसदको प्रभावकारितामाथि प्रश्न उठाए । संसदमा उठाइएका विषयको सुनुवाइ नभएको भन्दै उनले भने, “हामी संसदमा नयाँ छौंँ । तर पुराना दलले हामीलाई सिकाइ दिनुपर्यो कि संसदमा उठाइएका विषयमा सुनुवाइ कसरी हुन्छ ? सुनुवाइ कसरी हुन्छ ? हामी सिक्न चाहन्छौँ ।”
लामो समयदेखि न्यायका लागि माइतीघरमा बसेकाहरु असुरक्षित भएको सांसद झाको भनाइ थियो । विपद्को घडीमा कोही सत्तापक्ष र प्रतिपक्ष नहुने बताउउँदै उनले बझाङमा गएको भूकम्पबाट पीडित नागरिकले अझै राहत र पुनःस्थापनाको सुविधा पाउन नसकेको बताए ।
सांसद ज्ञानबहादुर शाहीले पछिल्ला वर्षमा विदेश जाने नेपालीको सङ्ख्या बढेको मात्र नभइ विदेशबाट शव फर्किने सङ्ख्या पनि बढिरहेकोबारे सरकारको ध्यानाकर्षण गराए । उनले पछिल्लो आधा दशकमा सार्वजनिक ऋण दोब्बरले बढेको भन्दै नेपालबाट वार्षिक रुपमा विदेशिने नागरिकको सङ्ख्या झन तेब्बरले बढेको बताए । सांसद शाहीले नेपाल वायुसेवा निगमको व्यवसाय विस्तारका लागि सरकारसँग आग्रह गरे ।
सांसद प्रदीप यादवले हाल बन्द रहेका उद्योगधन्दा सञ्चालनमा ल्याउनका माग गर्दै लामो समय बन्द रहेका कृषि औँजार कारखाना सञ्चालनमा ल्याउनु पर्नेमा जोड दिए ।
सांसद राजेन्द्र पाण्डेले दसैंँ, तिहारलगायत चाडबाडको समयमा यातायात व्यवस्था सहज बनाइनुपर्ने, अनियन्त्रित बनेको उपभोक्ता बजारलाई अनुगमन बढाउनुपर्नेलगायत माग गरे । टिकट समयमा नपाउने, महँगो मूल्य तिर्नुपर्ने, दैनिक उपभोग्य वस्तु अभावलगायत समस्या समाधानका लागि उनले सरकारको ध्यानाकर्षण गराए ।
भारतबाट प्रत्येकवर्ष नेपाल फर्किने नागरिकलाई सीमावर्ती क्षेत्रमा परीक्षणचका नाममा समस्या भोग्नु परेको उल्लेख गर्दै सांसद पाण्डेले सहज आवागमनका लागि छिमेकी मुलुक भारतसँग समन्वय गर्नुपर्नेमा जोड दिए । निर्माण व्यवसायीले सरकारबाट पाउनुपर्ने भुक्तानीका लागि उनले सरकारसँग आग्रह गरे ।
बैंक तथा वित्तीय संस्थाले निर्धारण गर्ने ब्याजदर र विभिन्न नाममा लिने सेवा शूल्यका विषय सांसद प्रभु साहले संसदमा उठाए । आम नागरिकले बैंकबाट सहज रुपमा कर्जा पाउन नसकेको उनको भनाइ थियो । रासस
