काठमाडौं, असोज २९ । खाद्य व्यवस्था तथा व्यापार कम्पनीले आजदेखि दशैँका लागि खसीबोका र च्याङ्ग्रा बिक्री गर्ने भएको छ।
धादिङ, मकवानपुर, रसुवा र दाङबाट खरिद गरिएका खसी, बोका र च्याङ्ग्रा आज काठमाडौं आइपुगेसँगै दिउँसोदेखि बिक्री शुरु गरिने कम्पनीले जनाएको हो ।
खाद्यले सहुलियतमा बिक्री गर्ने खसी, बोका र च्याङ्ग्रा थापाथलीस्थित बागमती प्रादेशिक कार्यालयबाट बिक्री गरिनेछ। कम्पनीले दुई हजार खसीबोका र एक हजार च्याङ्ग्रा बिक्री गर्ने जनाएको छ ।
खसी, बोका र च्याङ्ग्रा खरिदका लागि यो वर्ष ८ करोड ३३ लाख रुपैयाँ बजेट छुट्याएको छ। सरकारले खाद्य व्यवस्था तथा व्यापार कम्पनीबाट खरिद गरेर बिक्री गरिने खसी, बोका र च्याङ्ग्रामा प्रतिकिलो १० रुपैयाँ छुट दिने घोषणा गरिसकेको छ ।
