काठमाडौं, कार्तिक १ । त्रिकोणात्मक टी–२० सिरिज अन्तरगत पहिलो खेलमा आज नेपाल र यूएईले प्रतिस्पर्धा गर्दैछन् । दिउँसो १ बजेदेखि मूलपानी क्रिकेट ग्राउन्डमा हुने नेपाल–यूएईबीचको खेलमा नेपाल यूएईलाई हराउँदै विजयी सुरुवात गर्न चाहन्छ । पछिल्लो समय यूएईविरुद्ध नेपालले लगातार जित निकाल्दै आएको छ ।
यद्यपि टी–२० अन्तर्राष्ट्रिय क्रिकेटमा भने यूएईसँग नेपालको विगत प्रदर्शन सुखद छैन । यूएईविरुद्धको पछिल्लो पाँच टी–२० खेलमध्ये नेपालले तीनमा हार तथा दुई खेलमा मात्र जित निकालेको छ । यी दुई टिमले अन्तिमपटक २२ फेब्रुअरी २०२२ मा टी–२० खेलेका थिए ।
ओमानमा भएको सो खेलमा यूएईसँग नेपाल ६८ रनले पराजित भएको थियो । नेपाल यसपटक सो हारको बदला लिने रणनीतिमा छ । यूएई भने नेपाललाई घरेलु मैदानमा स्तब्ध पार्ने दाउमा छ ।
