काठमाडौं, २५ कार्तिक । नेकपा (एमाले)का महासचिव शंकर पोखरेलले सत्ता गठबन्धनका कारण मुलुकको अर्थतन्त्र तस्करहरूको हातमा पुगेको दाबी गरेका छन् । धुलिखेल नगर कमिटीले हिजो (शुक्रबार) आयोजना गरेको शुभकामना आदान प्रदान तथा चियापान कार्यक्रममा महासचिव पोखरेलले अबैधानिक क्षेत्रमा लगानी भइरहेकाले मुलुकमा आर्थिक तरलता बढिरहेको बताएका हुन् ।
एमाले सरकारमा रहेको समयमा नेपालको अर्थतन्त्र सुदृढ रहेको र अर्थतन्त्रका सबै सूचकाङ्क सकारात्मक रहेको स्मरण गर्दै उनले भने–‘अहिले मुलुक तस्करहरूको हातमा पुगेको छ र नेपाल दक्षिण एसियामै गरिब मुलुकका रूपमा चिनिएको छ । अहिलेको अराजकता, असफलता र जनतामा निराशा सिर्जना गर्न गठबन्धन सरकार जिम्मेवार रहेको उनको भनाइ छ ।
महासचिव शंकर पोखरेलले अहिलेको अराजकता र मुलुकको सङ्कट टार्ने क्षमता नेकपा (एमाले) बाहेक अरुसँग नभएको बताए । ‘नेकपा (एमाले) जनमतका हिसावले देशको ‘पपुलर’ पार्टी हो तर सरकारमा छैन,’ वर्तमान यथार्थ प्रस्तुत गर्दै महासचिव पोखरेलले भने– मुलुक निर्माणका लागि बलियो शक्ति निर्माण गर्नुको विकल्प छैन । राज्य सफल हुन सकेन भने जनताको समृद्धि असम्भव छ ।’
कोही सामाजिक सञ्जालमा पपुलिष्ट हुँदैमा मुलुकको विकास सम्भव नभएको उनको भनाई छ । महासचिव पोखरेलले अध्यक्ष केपी शर्मा ओली नेतृत्वको सरकारका समयमा सामाजिक सञ्जाल प्रयोगको व्यवस्थापनका लागि कानुन ल्याउन लाग्दा विरोध गरिएको स्मरण गर्दै आज गठबन्धन सरकारले त्यही कानुन ल्याउनुपर्ने महसुस भएको सुनाए । एमाले मुलुकको समग्र विकासका लागि नविनतम योजना तथा सोच र राष्ट्रियताका सवालमा एक कदम अघि रहेको उनको भनाइ छ ।
